யாழில் இடம்பெற்ற கலைப்பணி ஆற்றுகை நிகழ்வு
யாழில், ஆற்றல் மிகு ஈழத்தமிழ் சமூகத்தை உருவாக்க கலைப்பணி ஆற்றுகை நிகழ்வு சிறப்பாக நேற்று இடம்பெற்றது.
யாழ். பண்பாட்டுக்கூடத்தின் ஏற்பாட்டில் ஆற்றல் மிகு ஈழத்தமிழ் சமூகத்தை உருவாக்க கலைப்பணி ஆற்றுகை நிகழ்வு யாழ். கந்தர்மட பழம் வீதியில் அமைந்துள்ள யாழ். பண்பாட்டு கூடத்தில், ஊடக இணைப்பாளர் ப.தர்மினி தலைமையில் இடம்பெற்றது.
“ஆற்றல் மிகு ஈழத்தமிழ் சமூகத்தை உருவாக்க கலைப்பணி ஆற்றுவோம்” எனும் கருப்பொருளில், கலை நிகழ்வுகள் என்றால் என்ன? கலை நிகழ்வுகளை எப்படி நிகழ்த்துவது? கலை நிகழ்வுகளை நிகழ்த்தும் போது மக்கள் மத்தியில் ஏற்படக் கூடிய விளைவுகள் யாவை? ஆகிய வினாக்கள் தொடர்பாக, அண்மையில் யாழ்ப்பாணத்தில் நடந்த இசை நிகழ்வுகளை அடிப்படையாகக் கொண்டு பல குழப்பமான நிகழ்வுகள் எமது சமூகத்தில் நிலவுகின்றமை தொடர்பாக ஆற்றுகையிடப்பட்டது.
அதாவது, ஈழத்தமிழர்களிடையே கடந்த காலங்களில் நிலவிய கலை நிகழ்வுகள் எத்தகையன? அவை நிகழ்த்தப்பட்ட முறைமைகள் எத்தகையன? அவை மக்கள் மத்தியில் ஏற்படுத்திய விளைவுகள் யாவை? என்பன பற்றி விரிவாக துறைசார் வல்லுநர்களால் விரிவாக கலந்துரையாடப்பட்டன.
அத்துடன், எமது சமூகத்தை ஆற்றல் மிகு சமூகமாக மாற்றுவதற்கு நமக்குத் தேவைப்படும் கலை நிகழ்வுகள் பற்றிய உரையாடல்களும் இடம்பெற்றன.
இவ் நிகழ்வில், இணையத்தள மற்றும் இணைய வானொலி இயக்குநர்கள், ஊடகவியலாளர்கள், யாழ் பண்பாட்டு கூடத்தின் உறுப்பினர்கள் என பலரும் கலந்துகொண்டமை குறிப்பிடத்தக்கது.
