ரூ. 19,650 கோடியில் பிரமாண்ட நவி மும்பை சர்வதேச விமான நிலையம்
இந்தியா, மகாராஷ்டிரா மாநிலம், நவி மும்பையில் 19,650 கோடி ரூபாய் செலவில் பிரமாண்டமாக நிர்மாணிக்கப்பட்டுள்ள நவி மும்பை சர்வதேச விமான நிலையத்தை இந்தியப் பிரதமர் நரேந்திர மோடி நேற்று மாலை திறந்து வைத்தார்.
விமான நிலையத்தின் சிறப்பம்சங்கள்
சுமார் 1,160 ஹெக்டேர் பரப்பளவில் கட்டப்பட்டுள்ள இந்த விமான நிலையம், ஆசியாவின் மிகப்பெரிய இணைப்பு மையங்களில் ஒன்றாக அமையும் என எதிர்பார்க்கப்படுகிறது.
இந்த விமான நிலையத்தில் தற்போது நான்கு முனையங்கள், இரண்டு ஓடுபாதைகள் உள்ளன. மேலும், ஒரு பிரத்யேக வி.வி.ஐ.பி. முனையம் 2026இல் தொடங்கி 2030க்குள் நிறைவடையும் எனத் திட்டமிடப்பட்டுள்ளது.
டெர்மினல்-1 மட்டும் ஆண்டுதோறும் 2 கோடி பயணிகளையும், 8 லட்சம் மெட்ரிக் டன் சரக்குகளையும் கையாளும் திறன் கொண்டது.
3,700 மீட்டர் நீள ஓடுபாதையைக் கொண்டுள்ளதால், ஏர்பஸ் A380 போன்ற பெரிய விமானங்களையும் நிறுத்தும் திறன் இதற்கு உள்ளது.
லண்டனைத் தலைமையிடமாகக் கொண்ட ஜஹா ஹதீத் கட்டிடக் கலைஞர்களால் இந்த முனையம் கட்டப்பட்டுள்ளது. தாமரை இதழ்களைப் போன்ற 12 தூண்களும், 17 பிரமாண்ட நெடுவரிசை தூண்களும் கூரை விதானங்களைத் தாங்கியபடி நிற்கின்றன. இது நில அதிர்வுகள், புயல் போன்றவற்றைத் தாங்கும் வகையில் வடிவமைக்கப்பட்டுள்ளது.
சுற்றுச்சூழல் பாதுகாப்பு: இந்த விமான நிலையம் 47 மெகாவாட் சூரிய சக்தியை உருவாக்கும் திறன் கொண்டதுடன், மின்சாரப் பேருந்து சேவைகளையும் இயக்கும்.
போக்குவரத்து வசதி: ‘வாட்டர் டாக்ஸி’ சேவை மூலம் இணைக்கப்பட்ட இந்தியாவின் முதல் விமான நிலையமாக இது மாறவுள்ளது. மேலும், எளிதில் சென்றடைய அனைத்து வகை போக்குவரத்து வசதிகளும் ஏற்படுத்தப்பட்டுள்ளன.
பங்குதாரர்கள் மற்றும் செயல்பாடுகள்
விமான நிலையத்தின் பங்குகளில் 74% அதானி குழுமத்திடமும், 25% மகாராஷ்டிரா அரசிடமும் உள்ளன. புதிய விமான நிலையத்திலிருந்து உள்நாட்டு விமானப் போக்குவரத்து விரைவில் தொடங்கும் என எதிர்பார்க்கப்படுகிறது. மேலும், டிசம்பர் மாதத்திற்குள் சர்வதேச வழித்தடங்கள் தொடங்கத் திட்டமிடப்பட்டுள்ளது.
பிரதமர் மோடியின் உரை
புதிய விமான நிலையத்தைத் திறந்து வைத்து உரையாற்றிய பிரதமர் மோடி, “இந்த விமான நிலையம் ஆசியாவின் மிகப்பெரிய இணைப்பு மையமாக இருக்கும். இன்று, மும்பை முழுவதும் எளிதாகப் பயணிக்க வசதியாக நகரம் முழுவதும் நிலத்தடி மெட்ரோவையும் கொண்டுள்ளது. மும்பை போன்ற ஒரு நகரத்தில் இவ்வளவு கட்டுமானத்துடன் நிலத்தடி மெட்ரோவைத் தொடங்குவது ஒரு பெரிய சாதனை,” என்று தெரிவித்தார்.
