யாழில் இலக்கத் தகடற்ற புதிய காரில் ஹெரோயின் கடத்தல்! – பிரபல வர்த்தகரின் மகன் கைது!
யாழ்ப்பாணத்தில் இலக்கத் தகடற்ற புதிய கார் ஒன்றில் ஹெரோயின் போதைப்பொருளைக் கடத்திச் சென்ற நபர் ஒருவரை யாழ். மாவட்ட குற்றத்தடுப்புப் பிரிவு காவல்துறையினர் நேற்று திங்கட்கிழமை (ஒக்டோபர் 27) கைது செய்துள்ளனர்.
சம்பவத்தில் கைது செய்யப்பட்ட நபரிடமிருந்து 11 கிராம் 600 மில்லிகிராம் ஹெரோயின் மீட்கப்பட்டுள்ளது. கடத்தலுக்குப் பயன்படுத்தப்பட்ட அந்தப் புதிய காரும் காவல்துறையினரால் கைப்பற்றப்பட்டுள்ளது.
கைது செய்யப்பட்டவர் யாழில் உள்ள பிரபல வர்த்தகர் ஒருவரின் மகன் எனவும், இவர் ஏற்கனவே ஹெரோயின் போதைப்பொருள் தொடர்பான வழக்கொன்றில் கைதாகி பிணையில் விடுவிக்கப்பட்டவர் எனவும் காவல்துறையினர் தெரிவித்துள்ளனர்.
குறித்த நபர் கைதிலிருந்து தப்புவதற்காகக் காவல்துறையினருக்குக் கையூட்டு வழங்க முயற்சித்ததாகவும் காவல்துறையினர் குறிப்பிட்டுள்ளனர்.
கைதான சந்தேக நபரை மேலதிக விசாரணைகளுக்குப் பின்னர் யாழ்ப்பாணம் நீதிவான் நீதிமன்றத்தில் முற்படுத்த காவல்துறையினர் நடவடிக்கை எடுத்துள்ளனர்.
