அநுர தலைமையில் யாழில் ஆரம்பமாகும் தேசிய வீடமைப்புத் திட்டம்
“சொந்தமாக ஒரு இடம் – ஒரு அழகான வாழ்க்கை” என்ற தொனிப்பொருளில், 2026 ஆம் ஆண்டுக்கான தேசிய வீட்டுவசதித் திட்டத்தை ஜனாதிபதி அநுரகுமார திசாநாயக்க இன்று (16) யாழ்ப்பாணம், சாவகச்சேரி – மீசாலையில் உத்தியோகபூர்வமாக ஆரம்பித்து வைக்கின்றார்.
இந்த ஆண்டில் மட்டும் நாடு முழுவதும் 31,000 வீடுகளை நிர்மாணிப்பதே அரசாங்கத்தின் இலக்காகும் என வீடமைப்பு அமைச்சர் சுசில் ரணசிங்க தெரிவித்துள்ளார்.
உள்நாட்டுப் போரினால் இடம்பெயர்ந்த மக்களுக்காக முதற்கட்டமாக 2,500 வீடுகள் கட்டப்படவுள்ளன. இதில் இன்று 500 வீடுகளுக்கான பணிகள் தொடங்கப்படுகின்றன.
கடந்த காலங்களில் ஒரு வீட்டிற்கு 1.5 மில்லியன் ரூபாயே ஒதுக்கப்பட்டது. ஆனால், தற்போதைய கட்டுமானச் செலவுகளைக் கருத்திற்கொண்டு, ஜனாதிபதியின் பணிப்புரைக்கு அமைய இது 2 மில்லியன் ரூபாயாக அதிகரிக்கப்பட்டுள்ளது.
முதற்கட்டமாக யாழ்ப்பாணத்தில் தெரிவு செய்யப்பட்ட 500 குடும்பங்களுக்கு இதற்கான முதற்கட்டக் காசோலைகள் இன்றைய நிகழ்வில் ஜனாதிபதியால் வழங்கப்படவுள்ளன.
இந்தத் திட்டம் வடக்கில் நீண்டகாலமாக வீடற்ற நிலையில் வாழும் இடம்பெயர்ந்த மக்களுக்குப் பெரும் நம்பிக்கையை அளித்துள்ளது.
