டிரம்ப்பிற்கு ஏமாற்றம்: அமைதிக்கான நோபல் பரிசுக்கு வாய்ப்பில்லை – காரணம் என்ன?
உலக அளவில் உயரிய விருதாகக் கருதப்படும் நோபல் பரிசைப் பெறுவதற்கான வாய்ப்பு, முன்னாள் அமெரிக்க அதிபர் டொனால்ட் டிரம்ப்புக்கு அறவே இல்லை எனத் தகவல்கள் வெளியாகியுள்ளன. அமைதிக்கான நோபல் பரிசு அறிவிப்பு அக்டோபர் 10ஆம் திகதி வெளியாக இருக்கும் நிலையில் இந்தத் தகவல் வெளியாகியுள்ளது.
டிரம்ப் தனக்கு அமைதிக்கான நோபல் பரிசு வழங்கப்பட வேண்டும் என்று தெரிவித்துவரும் நிலையில், நோர்வே தலைநகர் ஒஸ்லோவில் உள்ள அமைதி ஆராய்ச்சி மையத்தின் பணிப்பாளர் நினா கிரேகர், டிரம்ப்புக்குக் கிடைப்பதற்கான வாய்ப்புகள் குறைவே எனக் குறிப்பிட்டுள்ளார்.
பரிந்துரை காலக்கெடு மீறல்:
2025ஆம் ஆண்டுக்கான பரிசுக்கான பரிந்துரைக்கப்பட வேண்டிய காலக்கெடு ஜனவரி 31 ஆகும்.
டொனால்ட் டிரம்ப்பின் பெயர், இந்தக் காலக்கெடுவுக்குப் பிறகு, அதாவது ஜனவரி 31க்குப் பிறகே பரிந்துரைக்கப்பட்டுள்ளது.
எனவே, நோபல் விதிகளின்படி, இந்தப் பரிந்துரை செல்லாது என்றும், இது 2026ஆம் ஆண்டுக்கான பரிசீலனைக்கு மட்டுமே எடுத்துக் கொள்ளப்படும் என்றும் கூறப்படுகிறது.
நோபல் குழுவின் எதிர்ப்பு:
முன்னதாக, இறுதிப் பட்டியலில் டிரம்ப்பின் பெயரைச் சேர்க்காததோடு, ஐந்து பேர் கொண்ட நோபல் குழுவின் பெரும்பாலான உறுப்பினர்கள் அவரது பரிந்துரைக்கும் எதிர்ப்புத் தெரிவித்திருந்தனர்.
மேலும், நோபல் பரிசு குழுவின் ஒரு உறுப்பினரே, அமெரிக்காவில் கல்வி நிறுவனங்களுக்கான சுதந்திரங்களை டிரம்ப் மறுப்பதாகக் கூறியுள்ளதும் கவனம் பெறுகிறது.
இந்த ஆண்டுக்கான பரிசீலனைப் பட்டியல்:
இந்த ஆண்டுக்கான நோபல் பரிசுக்காகச் சுமார் 338 நபர்கள் பரிந்துரைக்கப்பட்டுள்ளனர். இந்தப் பட்டியலில், சர்வதேச குற்றவியல் நீதிமன்றம், நேட்டோ, கொங்கொங் ஆர்வலர் சௌ ஹாங்-டங் மற்றும் கனேடிய மனித உரிமை சட்டத்தரணி இர்வின் கோட்லர் உள்ளிட்டோரின் பெயர்கள் உள்ளன.
நோர்வேக்கு ஏற்படக்கூடிய சிக்கல்:
ஒருவேளை, டிரம்ப்புக்கு நோபல் பரிசு அறிவிக்கப்படாவிட்டால், அது நோர்வேக்குச் சிக்கல்களை உருவாக்கலாம் என்று தெரிவிக்கப்படுகிறது. அமெரிக்காவின் 15 சதவீத வரியை அனுபவித்து வரும் நோர்வேக்கு, இது மேலும் அதிகரிக்கப்படலாம் என்றும், இரு நாடுகளின் உறவுகளிலும் பேச்சுவார்த்தைகளிலும் சிக்கலை உண்டாக்கலாம் என்றும் கூறப்படுகிறது.
