அடையாளம் காணப்பட்ட பல பகுதிகளில் மின்சாரக் கட்டணத்தை திருத்துவது கட்டாயம் என மின்சக்தி மற்றும் எரிசக்தி அமைச்சர் காஞ்சன விஜேசேகர தெரிவித்துள்ளார்.
குறைந்த வருமானம் பெறுபவர்கள் பாதிக்கப்படாத வகையில் கட்டணங்களை திருத்த திட்டமிட்டுள்ளதாக அவர் சுட்டிக்காட்டியுள்ளார்.இன்று (28) நடைபெற்ற ஊடகவியலாளர் சந்திப்பில் குறித்த விடயத்தை அவர் தெரிவித்தார்.
ஒரு யூனிட் நீர் மின்சாரத்தை உற்பத்தி செய்ய 4.17ரூபாவும் , எரிபொருளில் உற்பத்தி செய்ய 59.65 ரூபாவும், நிலக்கரி மூலம் உற்பத்தி செய்ய 31.19 ரூபாவும், தனியார் மின் உற்பத்தி நிலையங்கள் மூலம் மின்சாரம் தயாரிக்க 67.15 ரூபாவும் காற்றாலை மூலம் உற்பத்தி செய்ய 16.69 ரூபாய் செலவாகிறது என அவர் தெரிவித்துள்ளார்.நமது செலவுகள் அனைத்தையும் கணக்கிடும்போது ஒரு யூனிட் மின்சாரத்திற்கு ரூ.47.18 செலவாகிறது என அமைச்சர் சுட்டிக்காட்டியுள்ளார்.
மின்சாரம் தயாரிக்க அதிக செலவாகும், ஆனால் அனைவருக்கும் குறைவான கட்டணம். 30 யூனிட் பயன்படுத்துவோருக்கும் 180 யூனிட் பயன்படுத்துவோருக்கும் இதே நிலைதான்.குறைந்த வருமானம் உள்ள குடும்பங்கள் மற்றும் அரசு மருத்துவமனைகள் போன்றவற்றில் மின்கட்டண அதிகரிப்பை இந்த நேரத்தில் செய்யாவிட்டாலும், மின் கட்டணங்களைத் திருத்தக்கூடிய பகுதிகளில் ஏதாவது செய்ய வேண்டும்.
தொழில் மற்றும் ஹோட்டல் போன்ற துறைகளில், இந்த கட்டண திருத்தங்கள் விரைவுபடுத்தப்பட வேண்டும்.”
குறைந்த மின்சாரத்தைப் பயன்படுத்துபவர்களுக்கு பாதிப்பு ஏற்படாத வகையில், அமைச்சரவையின் ஒப்புதலுடனும், பொதுப் பயன்பாடுகள் ஆணைக்குழுவின் அனுமதியுடனும் குறித்த மின்கட்டண திருத்தங்களை எங்களால் செய்ய முடியும் என நம்புகின்றோம்.இந்த கட்டண திருத்தத்தால், மின் கட்டணம் மூன்று மடங்கு அல்லது நான்கு மடங்காக அதிகரிக்க வாய்ப்புள்ளது.என அமைச்சர் காஞ்சன விஜேசேகர மேலும் தெரிவித்துள்ளார்.
மேலும் சூரிய சக்தி மூலம் மின்சாரம் பெறும் திட்டம் ஜூன் 01 ஆம் திகதி முதல் ஆரம்பிக்கப்படவுள்ளதாகவும் அவர் தெரிவித்துள்ளார்.இது தொடர்பில் அரச மற்றும் தனியார் நிறுவனங்களுக்கு விழிப்புணர்வு ஏற்படுத்த நடவடிக்கை எடுக்கப்பட்டுள்ளதாகவும் அவர் கூறினார்.இதற்கிடையில், கச்சா எண்ணெய் சுத்திகரிப்பு நிலையத்தின் பணிகள் எதிர்வரும் இரண்டு நாட்களில் மீண்டும் ஆரம்பிக்கப்படும் எனவும் அவர் தெரிவித்துள்ளார்.
