கோரல் எனர்ஜி நிறுவனத்தினால் இலங்கைக்கு கொண்டு வரப்படும் கச்சா எண்ணெயின் தரமற்ற தன்மை காரணமாக சபுகஸ்கந்த எண்ணெய் சுத்திகரிப்பு நிலையத்தின் உற்பத்தி 22 வீதத்தால் குறைந்துள்ளதாக தெரிவிக்கப்படுகின்றது.
துபாயில் பதிவு செய்யப்பட்ட இந்த நிறுவனத்திடம் இருந்து கச்சா எண்ணெய் அல்லது சுத்திகரிக்கப்பட்ட எரிபொருளை வாங்க வேண்டாம் என பெற்றோலிய கூட்டுத்தாபன அதிகாரிகள் அறிவித்துள்ள நிலையில், அந்நிறுவனத்திடம் இருந்து கச்சா எண்ணெயை கொள்வனவு செய்ய அரசாங்கம் ஏற்பாடு செய்துள்ளதாக தெரிவிக்கப்படுகின்றது.
எவ்வாறாயினும், சபுகஸ்கந்த எண்ணெய் சுத்திகரிப்பு நிலையத்தின் கச்சா எண்ணெய் தரமற்றதாக இருப்பதால் அதன் உற்பத்தி குறைந்துள்ளதாக பெற்றோலிய பொது ஊழியர் சங்கத்தின் தலைவர் அசோக ரன்வல தெரிவித்துள்ளார்.
இவ்வாறானதொரு பின்னணியில், நாட்டில் உள்ள சில எரிபொருள் நிரப்பு நிலையங்களில் மீண்டும் வரிசைகள் காணப்படுவதாக குறிப்பிட்டுள்ளனர்.
இதேவேளை, பொதுப் பயன்பாடுகள் ஆணைக்குழுவின் தலைவர் ஜானக ரத்நாயக்க ஊடகங்களுக்கு பொறுப்பற்ற கருத்துக்களை வெளியிடுவதாக இலங்கை மின்சார சபை பொறியியலாளர்கள் சங்கம் அறிக்கையொன்றை வெளியிட்டுள்ளது.
மின் வாரிய ஊழியர்களின் சம்பளம் மற்றும் சலுகைகள் குறித்து சமூகம் தவறான எண்ணங்களைப் பெறுவதாகவும், அந்த செயல்முறையால், பொறியாளர்கள் உள்ளிட்ட ஊழியர்கள் மீது சமூகத்தின் அதிருப்தியையும் வெறுப்பையும் ஏற்படுத்துவதாகவும் அந்த அறிவிப்பில் கூறப்பட்டுள்ளது.
எரிசக்தித் துறை மறுசீரமைக்கப்படவுள்ள இந்த இக்கட்டான நேரத்தில், பொதுப் பயன்பாடுகள் ஆணைக்குழுவை உரிய முறையில் மறுசீரமைத்து, அத்துறை படுகுழியில் விழுவதைத் தடுக்குமாறு ஜனாதிபதியிடம் கோரிக்கை விடுக்கின்றனர்.
