தீபாவளி பண்டிகையை முன்னிட்டு விசேட போக்குவரத்துச் சேவைகள் ஆரம்பம்!
அடுத்த வாரம் வரவுள்ள தீபாவளிப் பண்டிகையை முன்னிட்டு, பொதுமக்கள் தமது சொந்த இடங்களுக்குச் செல்ல வசதியாகச் சிறப்பான போக்குவரத்துச் சேவைகள் ஆரம்பிக்கப்பட்டுள்ளதாக அறிவிக்கப்பட்டுள்ளது.
அதன்படி, இன்று சனிக்கிழமை (ஒக்டோபர் 18), கொழும்பின் புறக்கோட்டைப் பேருந்து நிலையத்திலிருந்து ஹட்டன், பதுளை, நுவரெலியா, மஸ்கெலியா, நானுஓயா மற்றும் யாழ்ப்பாணம் போன்ற முக்கிய நகரங்களுக்கு மேலதிகமாக 75 பேருந்துகள் சேவையில் ஈடுபடுத்தப்பட்டுள்ளன.
அதேபோல், நாளை ஞாயிற்றுக்கிழமை (ஒக்டோபர் 19) மேலும் 73 மேலதிகப் பேருந்துகள் சேவையில் இணைக்கப்படவுள்ளன.
பேருந்துச் சேவைகள் இவ்வாறு அதிகரிக்கப்பட்டுள்ள நிலையில், இன்றும் நாளையும் (ஒக்டோபர் 18 மற்றும் 19) தொடருந்துச் சேவைகள் வழமைபோல இயங்கும் எனத் தொடருந்துத் திணைக்களம் அறிவித்துள்ளது.
மேலும், ஊவா, சபரகமுவ, மத்திய மற்றும் கிழக்கு மாகாணங்களில் உள்ள தமிழ் பாடசாலைகளுக்குத் தீபாவளிப் பண்டிகையைத் தொடர்ந்து வரும் ஒக்டோபர் 21ஆம் திகதி விடுமுறை வழங்கப்பட உள்ளமையும் குறிப்பிடத்தக்கது.
