ஹோர்முஸ் நீரிணை மீண்டும் திறப்பு! – அமெரிக்காவுடனான பேச்சுவார்த்தைக்கு முன்னதாக ஈரான் அதிரடி முடிவு
பாகிஸ்தானின் இஸ்லாமாபாத் நகரில் அமெரிக்காவுடன் நடைபெறவுள்ள உயர்மட்டப் பேச்சுவார்த்தைக்கு முன்னதாக, வரும் வியாழன் அல்லது வெள்ளிக்கிழமையன்று ஹோர்முஸ் நீரிணை (Strait of Hormuz) மீண்டும் திறக்கப்படும் என ஈரானின் மூத்த அதிகாரி ஒருவர் தெரிவித்துள்ளார்.
அமெரிக்காவுடனான போர்நிறுத்த ஒப்பந்தத்தின் ஒரு பகுதியாக, கப்பல்கள் பாதுகாப்பாகச் செல்வதற்கு ஈரான் இந்த அனுமதியை வழங்கியுள்ளது.
இதற்காக ஈரானிய இராணுவம் மற்றும் கடற்படையுடன் ஒருங்கிணைந்த பாதுகாப்பு ஏற்பாடுகள் தயார் நிலையில் உள்ளதாகத் தெரிவிக்கப்பட்டுள்ளது.
போர் தொடங்கிய காலத்திலிருந்தே ஹோர்முஸ் நீரிணையை ஈரான் முடக்கியிருந்ததால், உலகளாவிய எண்ணெய் மற்றும் எரிவாயு சந்தைகள் பெரும் வீழ்ச்சியைச் சந்தித்தன.
தற்போது எட்டப்பட்டுள்ள போர்நிறுத்தக் கட்டமைப்பு முழுமையாக வெற்றிபெற்றால், இந்த நீரிணை திறப்பு நிரந்தரமாக்கப்படும் என அந்த அதிகாரி குறிப்பிட்டுள்ளார்.
பாகிஸ்தான் மத்தியஸ்தத்தில் நடைபெறும் இந்தப் பேச்சுவார்த்தை, மத்திய கிழக்கின் அமைதிக்கு மட்டுமன்றி உலகப் பொருளாதாரத்தின் ஸ்திரத்தன்மைக்கும் மிக முக்கியமானதாகக் கருதப்படுகிறது.
