கொட்டித் தீர்க்கப்போகும் இடியுடன் கூடிய கனமழை! மக்களுக்கு விடுக்கப்பட்டுள்ள அவசர அறிவுறுத்தல்!
இலங்கையின் சப்ரகமுவ, மேல் மற்றும் வடமேல் மாகாணங்களிலும் அத்துடன் காலி, மாத்தறை, கண்டி மற்றும் நுவரெலியா மாவட்டங்களிலும் அடிக்கடி மழை அல்லது இடியுடன் கூடிய மழை பெய்யக்கூடும் என வளிமண்டலவியல் திணைக்களம் இன்று விடுத்துள்ள அறிக்கையில் எச்சரித்துள்ளது.
குறிப்பாகக் குறிப்பிட்ட சில பிராந்தியங்களில் 50 மில்லிமீற்றரிலும் (50 mm) கூடிய ஓரளவு பலத்த மழை கொட்டித் தீர்க்கக்கூடும் எனத் தெரிவிக்கப்பட்டுள்ளது.
அதேசமயம், மத்திய மலைப் பிராந்தியத்தின் மேற்கு சரிவுகளிலும், வடக்கு மற்றும் வடமத்திய மாகாணங்களிலும் அத்துடன் ஹம்பாந்தோட்டை மற்றும் திருகோணமலை மாவட்டங்களிலும் மணித்தியாலத்திற்குச் சுமார் 40 முதல் 50 கிலோமீற்றர் (40 – 50 km/h) வேகத்தில் அடிக்கடி பலத்த காற்று வீசக்கூடும் என அதிகாரிகள் எச்சரித்துள்ளனர்.
மேலும், நாட்டின் ஏனைய பிராந்தியங்களில் மணித்தியாலத்திற்கு 30 முதல் 40 கிலோமீற்றர் வேகத்தில் அடிக்கடி ஓரளவு பலத்த காற்று வீசக்கூடும் எனவும் கூறப்பட்டுள்ளது.
இந்த நிலையில், பலத்த காற்று வீசும் போதும் மற்றும் மின்னல் தாக்கங்கள் ஏற்படும் சந்தர்ப்பங்களிலும் பொதுமக்கள் வீடுகளை விட்டு வெளியே வராமல் மிகவும் அவதானத்துடன் செயற்படுமாறு கேட்டுக் கொள்ளப்படுகின்றனர்.
