மஹிந்த ராஜபக்ஷவுக்குத் தூக்குத் தண்டனைதான் தீர்வு: சரத் பொன்சேகா ஆவேசம்

மஹிந்த ராஜபக்ஷவுக்குத் தூக்குத் தண்டனைதான் தீர்வு: சரத் பொன்சேகா ஆவேசம்

முன்னாள் இராணுவத் தளபதியும் பீல்ட் மார்ஷலுமான சரத் பொன்சேகா, முன்னாள் ஜனாதிபதி மஹிந்த ராஜபக்ஷவுக்குத் தூக்குத் தண்டனைதான் உரிய தண்டனை என்று தெரிவித்துள்ளார். மஹிந்த ராஜபக்ஷ தேசத்துரோகச் செயல்களில் ஈடுபட்டதாகவும் அவர் குற்றம் சாட்டியுள்ளார்.

மாத்தறையில் நடந்த நிகழ்வு ஒன்றில் உரையாற்றுகையிலேயே சரத் பொன்சேகா இந்தக் கடுமையான குற்றச்சாட்டுகளை முன்வைத்துள்ளார்.

பிரபாகரனைக் காப்பாற்றவே போர்நிறுத்தம்?

பிரபாகரன் உள்ளிட்ட தலைவர்களைக் காப்பாற்றுவதற்காகவே 2009 போரின் இறுதிக் கட்டத்தில், போர் முடிவுற 10 கிலோமீட்டர் தூரம் இருந்தபோது, மஹிந்த ராஜபக்ஷ போர் நிறுத்தத்தை அறிவித்தார். இதற்கான விளக்கத்தை அவர் நாட்டுக்குத் தெரிவிக்க வேண்டும்.

விடுதலைப் புலிகளுக்குப் பணம்: 2005ஆம் ஆண்டு ஜனாதிபதித் தேர்தலில் வெற்றிபெறுவதற்காக, விடுதலைப் புலிகளுக்கு 2 மில்லியன் அமெரிக்க டொலர்களைக் மஹிந்த ராஜபக்ஷ வழங்கியதாகக் குற்றம் சாட்டியுள்ளார்.

“நாங்கள் விடுதலைப் புலிகளுக்கு எதிராகப் போராடுகிறோம், ஆனால் அவர் அவர்களுக்குப் பணம் கொடுக்கிறார். விடுதலைப் புலிகளுக்குப் பணம் கொடுப்பது தேசத்துரோகம் இல்லையா?” என்று அவர் கேள்வி எழுப்பினார்.

ஊழல் மற்றும் தண்டனை கோரிக்கை

“நாட்டில் நிலவும் உலகளாவிய ஊழல் வலையமைப்பை ராஜபக்ஷ குடும்பமே கட்டுப்படுத்துகிறது.”

அவர்களின் சலுகைகளைப் பறித்து, அவர்களைச் சட்டத்தின் முன் நிறுத்த வேண்டும்.

தாம் நீதி அமைச்சராக இருந்தால், மஹிந்த ராஜபக்ஷ ஜனாதிபதி மாளிகை மற்றும் அலரி மாளிகையில் இருந்து எடுத்துச் சென்ற பெறுமதியான பொருட்களை 24 மணி நேரத்திற்குள் பறிமுதல் செய்து, அவரைக் கைது செய்வேன் என்றும் சரத் பொன்சேகா ஆவேசமாகத் தெரிவித்துள்ளார்.

“மற்ற நாடுகளாயின், மஹிந்த ராஜபக்ஷ கடுமையான தண்டனைக்கு ஆளாகியிருப்பார். எமது அரசியலமைப்பின்படியும், அவருக்குரிய தண்டனை தூக்குத் தண்டனையே” என்று அவர் இறுதியாகத் தெரிவித்துள்ளார்.