இந்துக்களின் புனித நாள் தீபாவளி இன்று கொண்டாட்டம்! – நாடு முழுவதும் விசேட நிகழ்வுகள்!
இருள் நீங்கி ஒளி பிறப்பதைக் குறிக்கும் இந்துக்களின் புனித தினமான தீபாவளித் திருநாள், இன்று திங்கட்கிழமை (ஒக்டோபர் 20) நாடு முழுவதும் மிகுந்த பக்தி சிரத்தையுடனும் மகிழ்ச்சியுடனும் கொண்டாடப்பட்டு வருகின்றது.
நரகாசுரன் எனும் அரக்கன் அழிந்த புராணக் கதையை முன்வைத்து, ஒளியின் அடையாளமாக கொண்டாடப்படும் இந்தப் பண்டிகைத் தினத்தில், இந்துக்கள் பல்வேறு சமய மற்றும் கலாசார நடைமுறைகளைப் பின்பற்றுகின்றனர்.
அதன்படி, இன்று அதிகாலையிலேயே இந்துக்கள் எண்ணெய் நீராடிப் புத்தாடை அணிந்து, அருகிலுள்ள ஆலயங்களுக்குச் சென்று பூஜை வழிபாடுகளில் ஈடுபட்டனர். மேலும், ஆலயங்களிலும், வீடுகளிலும் தீபங்களை ஏற்றி ஒளியேற்றிக் கடவுளை வழிபடுகின்றனர்.
வீடுகளில் பாரம்பரிய இனிப்புப் பலகாரங்களைத் தயாரித்து அண்டை அயலாருடன் மற்றும் உறவினர்களுடன் பகிர்ந்தளிப்பதும், பரிசுகளைப் பரிமாறிக்கொள்வதும் நாடு முழுவதும் உள்ள அனைத்துப் பிரதேசங்களிலும் நடைபெற்று வருவதாகத் தகவல்கள் தெரிவிக்கின்றன.
இலங்கையில் வாழும் அனைத்து இந்து மக்களும் இந்தப் புனிதத் திருநாளைக் கோலாகலமாகக் கொண்டாடி வருகின்றனர்.
