குறைந்த விலையில் ஜப்பானிய ஹைபிரிட் வாகனங்கள் இறக்குமதி
இறக்குமதி செய்யப்படும் வாகனங்களுக்கு விதிக்கப்படும் புதிய வரி தொடர்பில் அரசாங்கம் இன்னும் முடிவுக்கு வரவில்லை என அமைச்சரவைப் பேச்சாளர் நளிந்த ஜயதிஸ்ஸ தெரிவித்துள்ளார்.
நேற்றைய ஊடகவியலாளர் சந்திப்பில் கலந்துகொண்ட அவர், இந்த விஷயத்திற்கு உரிய அதிகாரபூர்வ அறிக்கையை நிதியமைச்சு எதிர்காலத்தில் வெளியிடும் என தெரிவித்துள்ளார்.
தனியார் வாகனங்களின் இறக்குமதி மீது உள்ள கட்டுப்பாடுகளை நீக்குவதற்கான அரசாங்கத் தீர்மானத்தின் பிறகு, வாகன இறக்குமதியாளர்களின் ஆர்வம் அதிகரித்துள்ளது. இதன் அடிப்படையில் இந்த அறிவிப்பு வெளியிடப்பட்டுள்ளது.
சந்தையில் தேவைகளை பூர்த்தி செய்ய ஜப்பானிலிருந்து ஏழு வருடம் பழைய ஹைபிரிட் வாகனங்களை இறக்குமதி செய்ய அனுமதிக்க கோரி வாகன இறக்குமதியாளர்கள் அரசாங்கத்திற்கு முன்மொழிவை சமர்ப்பித்துள்ளனர்.
ஆனால், இந்த பிரேரணை அண்மையில் நடைபெற்ற அமைச்சரவை கூட்டத்தில் ஆராயப்படவில்லை என அமைச்சர் நளிந்த ஜயதிஸ்ஸ விளக்கமளித்தார்.
வாகன இறக்குமதியாளர்களுடன் கலந்துரையாடல்களுக்குப் பிறகுதான் நிதி அமைச்சு முறையான முன்மொழிவுகளை எடுக்க முடியும் என அவர் கூறியுள்ளார்.
வாகன இறக்குமதி கட்டுப்பாடுகள் நீக்கப்பட்டு, வாகனங்களின் மலிவு விலை மற்றும் புதிய வரியின் விளைவுகள் குறித்து பேச்சுவார்த்தைகள் தீவிரமாக நடைபெற்று வருகின்றன.
