அதிவேக நெடுஞ்சாலையில் குப்பையை வீசிய யாழ் சாரதி கைது!
கொழும்பு – கட்டுநாயக்க அதிவேக நெடுஞ்சாலையில் (Colombo – Katunayake Expressway) குப்பைகளைக் கொட்டிய குற்றச்சாட்டில், யாழ்ப்பாணத்தைச் சேர்ந்த வேன் சாரதி ஒருவரை அதிவேக வீதிப் பொலிஸ் பிரிவின் அதிகாரிகள் நேற்று பிற்பகல் கைது செய்துள்ளனர்.
அதிவேக வீதியின் 19வது கிலோமீட்டர் மைல்கல் அருகே, கொழும்பில் இருந்து கட்டுநாயக்க நோக்கிப் பயணிகளை ஏற்றிச் சென்ற வேன் ஒன்றின் சாரதி, குப்பை அடங்கிய ஒரு பையைச் சாலையில் எறிவதை நடமாடும் சோதனையில் ஈடுபட்டிருந்த அதிகாரிகள் அவதானித்துள்ளனர்.
அதிகாரிகள் உடனடியாகச் சீதுவ துணைப் பரிபாலன நிலையத்துக்குத் தகவல் அளித்ததையடுத்து, அதிவேக வீதிச் சட்டத்தின் கீழ் குப்பைகளை வீசிய குற்றச்சாட்டில் குறித்த சாரதியைக் கைது செய்து, மேலதிக நடவடிக்கைகளுக்காகச் சீதுவப் பொலிஸ் நிலையத்தில் ஒப்படைத்துள்ளனர்.
கைது செய்யப்பட்டவர் யாழ்ப்பாணம், அல்வாய் பகுதியைச் சேர்ந்த 35 வயதுடையவர் எனப் பொலிஸார் தெரிவித்தனர்.
சந்தேகநபர் இன்று வியாழக்கிழமை (டிசம்பர் 11, 2025) நீர்கொழும்பு நீதவான் நீதிமன்றில் ஆஜர்படுத்தப்படவுள்ளார்.
