அரியாலையில் குப்பை கொட்டும் திட்டத்திற்கு மக்கள் கடும் எதிர்ப்பு; நல்லூர் பகுதியில் பதற்றம்
யாழ்ப்பாணம் அரியாலையில் குப்பை மேடு அமைக்கும் நல்லூர் பிரதேச சபையின் திட்டத்திற்கு அந்தப் பகுதி மக்கள் கடும் எதிர்ப்பை வெளிப்படுத்தியுள்ளனர். குப்பையைக் கொட்டுவதற்குத் தமது எதிர்ப்பைப் பதிவு செய்யும் விதமாக, அரியாலை கிழக்கு பகுதியில் இன்று (அக்டோபர் 8) மக்கள் ஆர்ப்பாட்டம் ஒன்றை நடத்தினர்.
ஆர்ப்பாட்டமும் எச்சரிக்கையும்
ஆர்ப்பாட்டக்காரர்கள் நல்லூர் பிரதேச சபையின் தவிசாளர் மயூரன் ஆர்ப்பாட்ட இடத்திற்கு வரவேண்டும் எனக் கோரி வீதியை வழிமறித்ததால், அப்பகுதியூடான போக்குவரத்து தடைப்பட்டது.
தவிசாளர் மயூரன் ஆர்ப்பாட்ட இடத்திற்கு வந்தபோது, மக்கள் தமது பாரிய எதிர்ப்பை வெளிப்படுத்தியதுடன், “குறித்த பகுதிக்கு இனிமேல் குப்பை கொட்டும் வாகனங்கள் வந்தால், அந்த வாகனங்களுக்கு ஏற்படும் பாதிப்புகளுக்கு நாங்கள் பொறுப்பல்ல” என எச்சரிக்கை விடுத்தனர்.
இதன்போது, தவிசாளரிடம் மகஜர் ஒன்றும் கையளிக்கப்பட்டது. அதன் பின்னர் போராட்டக்காரர்கள் பேரணியாகச் சென்று ஆளுநர் செயலகத்திலும் மகஜர் ஒன்றைக் கையளித்தனர்.
மக்களின் குற்றச்சாட்டுகள்
போராட்டத்தில் ஈடுபட்ட மக்கள் பின்வரும் கருத்துக்களைத் தெரிவித்தனர்:
“உலகமெங்கும் சுற்றுச்சூழல் பாதுகாப்புக்காக மக்கள் போராடி வருகின்றனர். அரியாலையூர் மக்களாகிய நாமும் நமது அழகிய ஊரின் நிலம், கடல், நீர்வளம், தூய காற்று போன்ற இயற்கையின் கொடைகளைக் காப்பாற்றுவதற்காகப் போராட வேண்டிய சூழ்நிலைக்குத் தள்ளப்பட்டுள்ளோம்.”
“நல்லூர் பிரதேச சபை, எமது ஊர் மக்களுடன் எந்த வகையிலும் கலந்து பேசாமல், சூழலை மாசுபடுத்தக்கூடிய குப்பைகளை எமது ஊருக்குக் கொண்டுவந்து கொட்டும் திட்டத்தை ஆரம்பித்திருப்பது ஏற்றுக்கொள்ள முடியாத அநீதியாகும்.”
“இயற்கைப் பசளை உற்பத்தி என்ற பெயரில் ஏமாற்றுத்தளமாக, வகைப்படுத்தப்படாத மக்காத குப்பைகளை எமது ஊரில் கொட்டி, எமது ஊரைக் குப்பைமேடாக மாற்றும் முயற்சியை நல்லூர் பிரதேச சபை உடனடியாகக் கைவிடவேண்டும்.”
ஆகவே, நல்லூர் பிரதேச சபை இந்தப் பிரச்சினைக்கு என்ன நடவடிக்கை எடுக்கப் போகிறது என்பதை அரியாலையூர் மக்கள் உன்னிப்பாகக் கவனித்து வருகின்றனர்.
