சீனா சென்று திரும்பிய பிரதமர் ஹரிணி அமரசூரிய இந்தியாவுக்குப் பயணம்!
இலங்கைப் பிரதமர் கலாநிதி ஹரிணி அமரசூரிய, 3 நாட்கள் உத்தியோகபூர்வ விஜயமொன்றை மேற்கொண்டு இன்று வியாழக்கிழமை (அக்டோபர் 16) இந்தியாவுக்குப் பயணம் மேற்கொண்டுள்ளார்.
பிரதமராகப் பதவியேற்ற பின்னர் ஹரிணி அமரசூரிய இந்தியாவுக்குச் சுற்றுப்பயணம் மேற்கொள்வது இதுவே முதல் முறையாகும்.
விஜயத்தின் நோக்கம்
இந்தியாவுக்குச் சென்றுள்ள பிரதமர் ஹரிணி அமரசூரிய, அங்குப் பல்வேறு அரசியல் தலைவர்களைச் சந்தித்து இருநாட்டு நலன்கள் சார்ந்த இருதரப்புக் கலந்துரையாடல்களை முன்னெடுக்கவுள்ளார்.
பிரதமரின் இந்த விஜயம், இந்தியா – இலங்கை இடையே உள்ள ஆழமான மற்றும் பன்முகத்தன்மை கொண்ட இருதரப்பு உறவுகளை மேம்படுத்தும் என்றும், இந்தியாவின் ‘மகாசாகர் தொலைநோக்குப் பார்வை’ மற்றும் ‘அண்டை நாடுகளுக்கு முன்னுரிமை’ ஆகிய கொள்கைகளை வலுப்படுத்தும் என்றும் இந்திய மத்திய வெளிவிவகார அமைச்சு தெரிவித்துள்ளது.
தொடர்ச்சியான இராஜதந்திர விஜயம்
பிரதமர் ஹரிணி அமரசூரிய, சீன விஜயத்தை நிறைவு செய்து நேற்று செவ்வாய்க்கிழமை (அக்டோபர் 15) காலை நாட்டை வந்தடைந்த நிலையில், இன்று வியாழக்கிழமை (அக்டோபர் 16) காலையே உடனடியாக இந்தியாவுக்கு இந்த விஜயத்தை மேற்கொண்டுள்ளமை குறிப்பிடத்தக்கது.
