நாடாளுமன்றில் அதிரடி விசேட பாதுகாப்புச் சோதனை
நவம்பர் மாதத்தில் மூன்று நாட்களுக்கு நாடாளுமன்றம் விசேட பாதுகாப்புச் சோதனைக்கு உட்படுத்தப்படும் என்று சபாநாயகர் இன்று (ஒக்டோபர் 23) நாடாளுமன்றத்தில் அறிவித்தார்.
பரிசோதனைத் தினங்கள்: நவம்பர் 4, 6 மற்றும் 7 ஆகிய மூன்று நாட்களில் இந்தச் சோதனை மேற்கொள்ளப்படவுள்ளது.
பரிசோதனைக்கு உட்படுத்தப்படுபவை: நாடாளுமன்ற உறுப்பினர்களின் ஓய்வறைகள், ஆடை அலுமாரிகள் உட்பட முழு நாடாளுமன்றக் கட்டிடமும் பாதுகாப்புச் சோதனைக்கு உட்படுத்தப்படும்.
உயர் பாதுகாப்புப் பகுதிகள்: நவம்பர் 7ஆம் திகதி நாடாளுமன்ற கட்டிடத்தின் உயர் பாதுகாப்புப் பகுதிகளும் சோதனைக்கு உட்படுத்தப்படும்.
கட்டுப்பாடுகள் மற்றும் அறிவுறுத்தல்கள்
நவம்பர் 7ஆம் திகதி பொது மக்கள் பார்வையிடும் பகுதி விருந்தினர்களுக்கு மட்டும் மட்டுப்படுத்தப்படும். இவர்களுக்கான அழைப்பிதழ்கள் நிதி அமைச்சினால் வழங்கப்படும்.
விசேட பாதுகாப்புத் திட்டம் நடைமுறையில் இருக்கும் வெள்ளிக்கிழமையான அன்று நாடாளுமன்றத்திற்கு வருகை தரும்போது நாடாளுமன்ற உறுப்பினர்கள் சாரதிகளுடன் வர வேண்டும்.
அன்று நாடாளுமன்ற வாகன நிறுத்துமிடம் மூடப்படும். நாடாளுமன்ற உறுப்பினர்கள் வரும் வாகனங்கள் வேறு வாகன நிறுத்துமிடத்திற்கு அனுப்பப்படும்.
அன்றைய தினம் விசேட போக்குவரத்துத் திட்டமும் செயற்படுத்தப்படும் என்று சபாநாயகர் மேலும் தெரிவித்தார்.
