போரை நிறுத்தத் தயார் : ஈரான் வெளியிட்டுள்ள தகவல்
தற்போது நிலவி வரும் போரை முழுமையாக முடிவுக்குக் கொண்டுவரும் எந்தவொரு முயற்சியையும் ஈரான் வரவேற்பதாக அந்நாட்டின் வெளியுறவு அமைச்சர் அப்பாஸ் அராக்சி (Abbas Araghchi) தெரிவித்துள்ளார்.
இந்த மோதல் ஈரானின் மீது திணிக்கப்பட்டது எனக் குறிப்பிட்ட அவர், போரை நிரந்தரமாக நிறுத்தும் வகையிலான எந்தவொரு ஆக்கபூர்வமான முன்மொழிவுகளையும் பரிசீலிக்கத் தயாராக இருப்பதாகவும் கூறியுள்ளார்.
ஈரான் வெறும் தற்காலிகப் போர்நிறுத்தத்தை விரும்பவில்லை எனவும், முழுமையான மற்றும் நீடித்த தீர்வையே நாடுவதாகவும் அராக்சி வலியுறுத்தியுள்ளார்.
இருப்பினும், சில நாடுகள் அமைதிக்கு முயன்ற போதிலும், அமெரிக்கா தனது தாக்குதல்களை நிறுத்தத் தயாராக இல்லை எனத் தெரிகிறது என்று அவர் பகிரங்கமாகக் குற்றம் சாட்டியுள்ளார்.
இதனிடையே, ஈரானுக்கு எதிரான போரில் அமெரிக்கா தனது இலக்குகளை அடைவதற்கு மிக அருகில் உள்ளதாக ஜனாதிபதி டொனால்ட் ட்ரம்ப் தெரிவித்துள்ளார்.
இராணுவ நடவடிக்கைகளை முடிவுக்குக் கொண்டுவருவது குறித்துத் தாங்கள் பரிசீலித்து வருவதாகக் குறிப்பிட்ட ட்ரம்ப், அமெரிக்காவின் பாதுகாப்பு நோக்கங்கள் நிறைவேறிய பின்னரே இறுதி முடிவு எட்டப்படும் என்பதைச் சூசகமாகத் தெரிவித்துள்ளார்.
