யாழில் சட்டவிரோதமாகப் பதுக்கப்பட்ட 5,900 லீற்றர் எரிபொருள் மீட்பு
யாழ்ப்பாணம் ஊரெழு பகுதியில் உள்ள தனியார் நிறுவனம் ஒன்றின் களஞ்சியசாலையில் சட்டவிரோதமாகப் பதுக்கி வைக்கப்பட்டிருந்த பெருமளவான எரிபொருட்களை யாழ். மாவட்ட குற்றத்தடுப்புப் பிரிவினர் இன்று ஞாயிற்றுக்கிழமை (22) அதிரடியாகக் கைப்பற்றியுள்ளனர்.
இரகசியத் தகவலின் அடிப்படையில் மேற்கொள்ளப்பட்ட இந்தச் சோதனையின் போது, விற்பனைக்காகப் பதுக்கி வைக்கப்பட்டிருந்த 4,700 லீற்றர் டீசல், 800 லீற்றர் பெற்றோல் மற்றும் 400 லீற்றர் மண்ணெண்ணெய் என்பன மீட்கப்பட்டுள்ளன.
இந்தச் சம்பவம் தொடர்பாகக் களஞ்சியசாலையின் உரிமையாளர் எனச் சந்தேகிக்கப்படும் நபர் ஒருவரைப் பொலிஸார் கைது செய்துள்ளனர்.
நாட்டில் நிலவும் எரிபொருள் விலையேற்றம் மற்றும் தட்டுப்பாட்டைப் பயன்படுத்தி, அதிக லாபத்திற்கு விற்பனை செய்யும் நோக்கில் இவை பதுக்கப்பட்டிருக்கலாம் எனச் சந்தேகிக்கப்படுகிறது.
கைது செய்யப்பட்ட நபரிடம் மேலதிக விசாரணைகளை முன்னெடுத்து வரும் பொலிஸார், அவரை யாழ்ப்பாணம் நீதவான் நீதிமன்றத்தில் முற்படுத்த நடவடிக்கை எடுத்துள்ளனர்.
எரிபொருள் விநியோகம் சீராக நடைபெற்று வரும் சூழலில், இவ்வாறான சட்டவிரோத பதுக்கல் நடவடிக்கைகளில் ஈடுபடுவோருக்கு எதிராகக் கடும் நடவடிக்கை எடுக்கப்படும் எனப் பொலிஸார் எச்சரித்துள்ளனர்.
யாழ். மாவட்டத்தின் பல பகுதிகளிலும் இவ்வாறான இரகசியக் களஞ்சியசாலைகள் தொடர்பில் புலனாய்வுப் பிரிவினர் கண்காணிப்பைத் தீவிரப்படுத்தியுள்ளனர்.
