இலங்கையில் பாதுகாப்பு, நீதி தொடர்பான கவலைகள் குறித்து உலக அமைப்புகளிடம் முறையிடும் எதிர்க்கட்சிகள்
இலங்கையில் அதிகரித்து வரும் வன்முறைகள் மற்றும் நீதித்துறையின் அரசியல்மயமாக்கல் குறித்து சர்வதேச பார் அசோசியேஷன் உள்ளிட்ட உலகளாவிய அமைப்புகளுக்கு எதிர்க்கட்சிகள் கூட்டாகக் கடிதம் எழுதியுள்ளன.
குறிப்பாக, கடந்த பெப்ரவரி 13ஆம் திகதி அதியுயர் பாதுகாப்பு வலயத்திற்கு அருகே சட்டத்தரணி புத்திக மல்லவாரச்சி மற்றும் அவரது மனைவி பட்டப்பகலில் சுட்டுக்கொல்லப்பட்ட சம்பவம் நாட்டு மக்களிடையே பெரும் அதிர்ச்சியை ஏற்படுத்தியது.
இதனைக் கண்டித்து, 14 ஆண்டுகளுக்குப் பின்னர் இலங்கை சட்டத்தரணிகள் சங்கம் கடந்த பெப்ரவரி 16 அன்று நாடு தழுவிய ரீதியில் நீதிமன்ற நடவடிக்கைகளைப் புறக்கணித்திருந்தது.
இக்கொலைச் சம்பவம் நடந்து ஒரு மணி நேரத்திற்குள்ளேயே, பாதிக்கப்பட்ட சட்டத்தரணியைக் குற்றவாளிகளுடன் தொடர்புபடுத்தி காவல்துறை அறிக்கை வெளியிட்டமையானது, விசாரணையின் நடுநிலைமையைக் கேள்விக்குறியாக்கியுள்ளதாக எதிர்க்கட்சிகள் சாடியுள்ளன.
2026ஆம் ஆண்டின் இதுவரையான காலப்பகுதியில் மட்டும் 9 பேர் படுகொலை செய்யப்பட்டுள்ள நிலையில், பொதுப் பாதுகாப்பு அமைச்சர் ஆனந்த விஜயபால தனது கடமையில் தோல்வியடைந்துள்ளதாக இந்தக் கடிதத்தில் சுட்டிக்காட்டப்பட்டுள்ளது.
புதிய பயங்கரவாத எதிர்ப்புச் சட்டம் ஊடக சுதந்திரத்தையும், ஜனநாயக விழுமியங்களையும் நசுக்கப் பயன்படுத்தப்படுவதாக எதிர்க்கட்சிகள் எச்சரித்துள்ளன.
சஜித் பிரேமதாச, ரணில் விக்ரமசிங்க, நாமல் ராஜபக்ச, ஜீவன் தொண்டமான் உள்ளிட்ட பிரதான எதிர்க்கட்சித் தலைவர்கள் ஒன்றிணைந்து இந்தக் கடிதத்தில் கையொப்பமிட்டுள்ளனர்.
இலங்கையின் நீதித்துறை கட்டமைப்பைப் பாதுகாக்கவும், சட்டத்தரணிகளின் உயிருக்கு உத்தரவாதம் அளிக்கவும் சர்வதேச சமூகம் உடனடியாகத் தலையிட வேண்டும் என அவர்கள் வலியுறுத்தியுள்ளனர்.
(News Wire)
