யாழில் அதிகாலையில் பரபரப்பு: வீடு சுற்றி வளைப்பு
யாழ்ப்பாணத்தில் இளைஞர்களை வன்முறைக்குத் தூண்டும் வகையில் செயற்பட்ட நபர் ஒருவரின் வீடு இன்று புதன்கிழமை (ஒக்டோபர் 22, 2025) அதிகாலை, காவல்துறை மற்றும் விசேட அதிரடிப் படையினரால் சுற்றி வளைக்கப்பட்டுச் சோதனைக்கு உட்படுத்தப்பட்டுள்ளது.
யாழ்ப்பாணம் – முலவை சந்திக்கு அருகில் உள்ள வீடொன்றிலேயே யாழ்ப்பாண தலைமை காவல் நிலையப் பொறுப்பதிகாரி தலைமையிலான இந்தக் குழு சோதனை நடத்தியது.
சம்பவத்தின் பின்னணி:
யாழ். காவல் நிலையப் பகுதிக்கு உட்பட்ட இடத்தில் வசிக்கும் இளைஞன் ஒருவரின் பிறந்தநாளை முன்னிட்டு, பெருமளவான இளைஞர்கள் ஒன்று கூடிப் பிரமாண்டமான பிறந்தநாள் கொண்டாட்டங்களை முன்னெடுத்தனர். இவை தொடர்பான காணொளிகள் டிக்டொக் உள்ளிட்ட சமூக வலைத்தளங்களில் பதிவேற்றப்பட்டன.
இந்தச் சம்பவம் குறித்துப் பல்வேறு தரப்பினரும் அதிருப்தி வெளியிட்டதுடன், நாடாளுமன்ற உறுப்பினர் க. இளங்குமரன் பகிரங்கமாக விசாரணைகள் கோரியிருந்தார்.
சட்டவிரோதமான முறையில் இளைஞர்களை ஒன்று கூட்டியமை, இளைஞர்களை வன்முறைக்குத் தூண்டும் வகையில் செயற்பட்டமை உள்ளிட்ட குற்றச்சாட்டுகளின் கீழ் இளைஞனின் வீட்டில் சோதனை நடத்த, யாழ்ப்பாண நீதவான் நீதிமன்றில் காவல்துறையினர் நேற்றைய தினம் (செவ்வாய்க்கிழமை) அனுமதி கோரி இருந்தனர்.
அதிரடிக் கைதுகள்:
நீதிமன்றின் அனுமதியைப் பெற்ற காவல்துறையினர், இன்று அதிகாலை அந்த இளைஞனின் வீட்டினை அதிரடிப் படையினரின் ஒத்துழைப்புடன் முற்றுகையிட்டுத் தேடுதல் நடத்தினர்.
வீட்டில் காவல்துறையினர் தேடுதல் நடத்தியபோது குறித்த இளைஞன் வீட்டில் இருக்கவில்லை. எனினும், வீட்டில் தங்கியிருந்த இரு இளைஞர்களைச் சந்தேகத்தின் பேரில் காவல்துறையினர் கைது செய்துள்ளனர்.
மேலும், வீட்டில் நிறுத்தி வைக்கப்பட்டிருந்த இரண்டு மோட்டார் சைக்கிளையும் காவல்துறையினர் மீட்டுள்ளனர். கைது செய்யப்பட்ட இருவரும் காவல் நிலையத்தில் தடுத்து வைக்கப்பட்டுத் தீவிர விசாரணைகளுக்கு உட்படுத்தப்பட்டு வருகின்றனர்.
