இந்தியா – இலங்கை படகு சேவை இடைநிறுத்தம்! – டிசம்பரில் மீண்டும் ஆரம்பமாகும்!
வடகிழக்குப் பருவமழை ஆரம்பித்துள்ளதையடுத்து, இந்தியாவின் நாகப்பட்டினம் மற்றும் இலங்கையின் காங்கேசன்துறைக்கு இடையேயான பயணிகள் படகு சேவை தற்காலிகமாக இடைநிறுத்தப்பட்டுள்ளது.
சீரற்ற காலநிலை முன்னறிவிப்பால், நேற்று ஞாயிற்றுக்கிழமை (ஒக்டோபர் 26) முதல் ஒக்டோபர் 28ஆம் திகதி வரை திட்டமிடப்பட்டிருந்த பயணங்களை இரத்துச் செய்வதாகச் சுபம் படகு நிறுவனம் அறிவித்துள்ளது.
நவம்பர் மாதம் முதல் வருடாந்தச் சேவைகளை இடைநிறுத்துவதற்கு முன்னரே இந்த இரத்து அறிவிப்பு வந்துள்ளது.
படகு சேவைகள் எதிர்வரும் டிசம்பர் மாதம் மீண்டும் ஆரம்பிக்கப்படும் என்று அறிவிக்கப்பட்டுள்ளது.
சுபம் படகு நிறுவனத்தின் தலைவர் சுந்தர்ராஜ் பொன்னுசாமி தெரிவிக்கையில், “படகை உலர்த்தவும், புதுச்சேரியில் வழக்கமான பராமரிப்புப் பணிகளை மேற்கொள்ளவும் இந்த இடைவேளையைப் பயன்படுத்துவோம். படகின் இருக்கைத் திறனை 150 இலிருந்து 186 ஆக அதிகரிக்கவும் திட்டமிட்டுள்ளோம்” என்றார்.
