நானும் எனது அரசாங்கமும் மோதுவதற்குத் தயார்! – ஜனாதிபதி அநுர
போதைப்பொருளுக்கு எதிரான ‘முழு நாடும் ஒன்றாக’ தேசியச் செயற்றிட்டத்தை ஜனாதிபதி அநுரகுமார திஸாநாயக்கவின் தலைமையில் கொழும்பிலுள்ள சுகததாஸ உள்ளக அரங்கில் இன்று வியாழக்கிழமை (ஒக்டோபர் 30) ஆரம்பித்து வைக்கப்பட்டது.
இதில் உரையாற்றிய ஜனாதிபதி, “நானும் எனது அரசாங்கமும் போதைப்பொருளுக்கு எதிராக மோதுவதற்குத் தயார்” எனத் தெரிவித்தார்.
ஜனாதிபதியின் முக்கிய அறிவிப்புகள் மற்றும் கருத்துக்கள்:
சிறைத் தண்டனை விதிக்கப்படுவோரில் 64 வீதமானோர் போதைப்பொருள் குற்றச்சாட்டுகளுடன் தொடர்புடையவர்கள் என்று அவர் சுட்டிக்காட்டினார்.
போதைப்பொருள் அச்சுறுத்தலை ஒழிக்க ஒரு வலுவான மக்கள் இயக்கம் உருவாக்கப்படும் என்றும், போதைக்கு அடிமையானவர்கள் மற்றும் போதைப்பொருள் விற்பனையாளர்கள் தங்கள் சட்டவிரோத நடைமுறைகளை நிறுத்த அழைப்பு விடுக்கப்படும் என்றும் தெரிவித்தார்.
“அரசாங்கமும் பொலிஸ் திணைக்களமும் தனியாக போதைப்பொருளைத் தடுக்கும் செயற்பாட்டை முன்னெடுக்க முடியாது. அழிவுகரமான அச்சுறுத்தலை ஒழிப்பதில் அனைவரும் ஒன்றுபட வேண்டும்.”
“போதைப்பொருளுக்கு உதவும் பொலிஸார் விலகிக்கொள்ள வேண்டும் என்றும் இல்லாவிட்டால் அவர்களை நாங்கள் விலக்குவோம்,” என அவர் எச்சரித்தார்.
போதைப்பொருள் கடத்தலைத் தடுப்பதற்காக பொலிஸ், இராணுவம், சுங்கம், குடிவரவு மற்றும் குடியகல்வுத் திணைக்களம், மோட்டார் போக்குவரத்துத் திணைக்களம் மற்றும் புலனாய்வு சேவைகள் ஆகியவற்றை உள்ளடக்கிய ஒரு தேசியச் செயற்பாட்டு மையம் நிறுவப்படும் என்றார்.
தேசியச் செயற்றிட்டத்தின் நோக்கம்:
போதைப்பொருள் பாவனையை நாட்டில் இருந்து முழுமையாக இல்லாதொழிக்கும் பொருட்டு, ஜனாதிபதியால் முன்வைக்கப்பட்ட இந்த யோசனைக்கு அமைச்சரவை அங்கீகாரம் அளித்துள்ளது.
தேசிய வழிநடத்தல் சபையானது பின்வரும் விடயங்களில் கவனம் செலுத்தவுள்ளது:
போதைப்பொருள் வலையமைப்பை இல்லாதொழித்தல்.
போதைப்பொருளுக்கு அடிமையாகியுள்ளவர்களுக்குப் புனர்வாழ்வளித்தல்.
போதைப்பொருள் ஒழிப்புக்குப் பொதுமக்களின் ஒத்துழைப்பைப் பெற்றுக்கொள்ளல்.
பொதுமக்களுக்கு விழிப்புணர்வு வழங்கல்.
பொதுசன நிறுவனங்களை ஒன்றிணைத்து ஊடகக் கண்காணிப்புகளை மேற்கொள்ளல்.
இந்தத் தேசியத் திட்டத்தில் மத குருமார்கள், பொதுப் பாதுகாப்புக் குழுக்கள், பொலிஸ் மற்றும் முப்படையினர், வெளிநாட்டுத் தூதுவர்கள் உள்ளிட்டோர் பங்கேற்றிருந்தனர்.
