முன்னாள் ஜனாதிபதிகளின் பாதுகாப்புப் பிரிவில் பாதாள உலகக் குழுவினர்! – ஜனாதிபதி அநுர பகிரங்கம்!
முன்னாள் ஜனாதிபதிகளின் பாதுகாப்புப் பிரிவில் பாதாள உலகக் குழுவினர் கடமை புரிந்துள்ளனர் என்று ஜனாதிபதி அநுரகுமார திஸாநாயக்க தெரிவித்துள்ளார். ஆனால், தற்போதுள்ள அரசாங்கம் எந்தவொரு குற்றவாளிக்கும் அரசியல் அடைக்கலம் வழங்காத அரசாங்கமே அரச இயந்திரத்தை இயக்குவதாகவும் அவர் உறுதிபடக் கூறியுள்ளார்.
தேசிய பேரழிவாக மாறியுள்ள போதைப்பொருட்களிலிருந்து இலங்கைச் சமூகத்தை விடுவிப்பதை நோக்கமாகக் கொண்ட ‘முழு நாடுமே ஒன்றாக’ என்ற கருப்பொருளிலான தேசிய செயற்பாடு, இன்று வியாழக்கிழமை (நவம்பர் 20, 2025) தங்காலை பொது விளையாட்டு மைதானத்தில் ஜனாதிபதி தலைமையில் நடைபெற்றது.
அரசியல் அடைக்கலம்: திட்டமிட்டுக் குற்றச்செயல்களில் ஈடுபடும் பாதாள உலகக் குழுவினர் போதைப்பொருள் கடத்தல் மூலம் அதிக நிதி ஈட்டி, அரசியல் தலைவர்களின் அடைக்கலத்தில் வாழ்ந்து வந்துள்ளனர்.
“ஒரு காலகட்டத்தில் அரசியல் கட்சிகளின் மத்திய செயற்குழுக்களின் அதிகாரம் பாதாள உலகக் குழுக்களின் வசம் காணப்பட்டது. அதேபோல் ஜனாதிபதியின் பாதுகாப்புப் பிரிவில் பாதாள உலகக்குழுவினர் அடங்கியிருந்தனர். அதுதான் உண்மை.”
அரசாங்கத்தின் உறுதிமொழி:
“நாம் இந்த இடத்தில் உறுதிபட ஒரு விடயத்தினை தெரிவித்துக்கொள்கின்றோம். எந்தவொரு குற்றவாளிக்கும் அரசியல் அடைக்கலம் வழங்காத அரசாங்கம் ஒன்றே ஆட்சியில் உள்ளது.”
போதைப்பொருள் ஒழிப்பு தேசிய வேலைத்திட்டம் மக்களின் அபிலாஷைகளைப் பூர்த்தி செய்வதற்காகவே ஆரம்பிக்கப்பட்டுள்ளது.
நேற்று இரவும் போதைப்பொருளுடன் மீன்பிடிப் படகொன்று கைப்பற்றப்பட்டுள்ளதாகவும், கடற்படையினர் இதற்குப் பாரிய ஒத்துழைப்பு வழங்கி வருவதாகவும் அவர் சுட்டிக்காட்டினார்.
போதைப்பொருள் ஒழிப்பு தேசிய வேலைத்திட்டத்திற்கு எதிராகச் சிலர் சூழ்ச்சித் திட்டங்களை மேற்கொண்டு வருவதாகவும், அரசாங்கத்தின் இந்த இலக்கை முறியடிப்பதற்காக மக்கள் எதிர்ப்புப் பேரணிகள், போராட்டங்கள் ஏற்பாடு செய்யப்படலாம் எனவும் ஜனாதிபதி மேலும் தெரிவித்துள்ளார்.
