சற்றுமுன் தலங்கம காவல் நிலையத்தில் முன்னாள் அமைச்சர் விமல் வீரவங்ச முன்னிலை!
தாய்நாட்டிற்காக உயிர்த்தியாகம் செய்த போர்வீரர்களின் நினைவு அஞ்சலி நிகழ்விற்கான ஒத்திகையை, கடந்த சில நாட்களுக்கு முன்னர் குழப்ப முயற்சித்ததாகக் கூறப்படும் சம்பவம் தொடர்பில், முன்னாள் அமைச்சர் விமல் வீரவங்சவிற்குப் பொலிஸார் அவசர அறிவித்தல் விடுத்திருந்தனர்.
இதன் அடிப்படையில், இன்று காலை அவர் கொழும்பு, தலங்கம காவல் நிலையத்தில் நேரில் முன்னிலையாகி வாக்குமூலம் வழங்கி வருகிறார்.
முன்னதாக நேற்று கொழும்பில் நடைபெற்ற விசேட ஊடகவியலாளர் சந்திப்பில் பேசிய அவர், தாய்நாட்டுக்காக உயிர்த்தியாகம் செய்த போர் வீரர்களுக்கு மலர் அஞ்சலி செலுத்தச் சென்ற தங்களை, பாதுகாப்புத் தரப்பினர் அநாவசியமாகத் தடுத்துக் குற்றவாளிகளைப் போல் நடத்துவதாகக் கவலை வெளியிட்டிருந்தார்.
தொடர்ந்து தற்போதைய அரசு மீது கடுமையான குற்றச்சாட்டுகளை முன்வைத்த விமல் வீரவங்ச, நாட்டில் சட்டம் அனைவருக்கும் சமமானது என்று ஜனாதிபதி அநுரகுமார திஸாநாயக்க மேடைகளில் கூறுகின்றார், ஆனால் நடைமுறையில் அது அவ்வாறு செயற்படவில்லை என்றார்.
நீதி அமைச்சுக்குச் சொந்தமானதாக அறிவிக்கப்பட்டுள்ள மல்வானை மாளிகையைச் சட்டவிரோதமாக ஆக்கிரமித்தவர்களுக்கு எதிராகத் தற்போதைய அரசோ அல்லது காவல்துறையினரோ இதுவரை எந்தவொரு சட்ட நடவடிக்கையும் எடுக்கவில்லை எனச் சாடினார்.
பொது இடத்திற்கு அஞ்சலி செலுத்தச் சென்ற தங்களுக்கு எதிராகப் பாயும் சட்டம், அரசுச் சொத்தை ஆக்கிரமித்தவர்களிடம் மௌனமாக இருப்பதாகக் கூறி அவர் தனது கண்டனத்தைப் பதிவு செய்துள்ளார்.
