ஈரான் கண்டிராத பேரழிவு: சவுத் பார்ஸ் எரிவாயு வயலை உருக்குலைக்கப் போவதாக ட்ரம்ப் எச்சரிக்கை
ஈரானின் சவுத் பார்ஸ் எரிவாயு வயல் மீது இஸ்ரேல் நடத்திய தாக்குதலுக்கும், அமெரிக்கா அல்லது கட்டார் நாட்டிற்கும் எந்தத் தொடர்பும் இல்லை என ஜனாதிபதி ட்ரம்ப் தெளிவுபடுத்தியுள்ளார். இருப்பினும், ஈரான் மீண்டும் கட்டாரின் திரவ இயற்கை எரிவாயு (LNG) வசதிகள் மீது தாக்குதல் நடத்தினால், சவுத் பார்ஸ் எரிவாயு வயலை “முன்பு எப்போதும் கண்டிராத வலிமையுடன்” அமெரிக்கா அழித்துவிடும் என அவர் எச்சரித்துள்ளார்.
தனது ‘ட்ரூத் சோஷியல்’ தளத்தில் பதிவிட்டுள்ள ட்ரம்ப், “இந்தத் தாக்குதல் பற்றி அமெரிக்காவிற்கு முன்னரே தெரியாது; இதில் கட்டார் எந்த வகையிலும் சம்பந்தப்படவில்லை” எனக் குறிப்பிட்டுள்ளார். கட்டார் மீதான ஈரானின் ஆக்கிரமிப்பைத் தடுக்கவே இந்த எச்சரிக்கை விடுக்கப்பட்டுள்ளதாகக் கருதும் அவர், இவ்வாறான ஒரு பெரும் அழிவை தாம் விரும்பவில்லை என்றும், அதனைத் தவிர்ப்பது ஈரானின் கையிலேயே உள்ளதாகவும் சுட்டிக்காட்டியுள்ளார்.
உலகின் மிகப்பெரிய எரிவாயு வயல்களில் ஒன்றான சவுத் பார்ஸ் முடக்கப்பட்டால், அது ஈரானின் பொருளாதாரத்தை அடியோடு சாய்த்துவிடும் எனப் பொருளாதார நிபுணர்கள் கருதுகின்றனர். ஈரானின் பதில் தாக்குதல்களை முறியடிக்க அமெரிக்கா தயாராகி வரும் நிலையில், ட்ரம்ப்பின் இந்த “வலிமையான பதிலடி” குறித்த கருத்து சர்வதேச அளவில் பெரும் பரபரப்பை ஏற்படுத்தியுள்ளது.
