தமிழரசுக் கட்சியால் உயிருக்கு அச்சுறுத்தல்? நாடாளுமன்றத்தில் அவசரப் பாதுகாப்பு கோருகிறார் எம்.பி அர்ச்சுனா!
நாடாளுமன்றத்தில் நேற்று புதன்கிழமை நடைபெற்ற அமர்வின் போது, நாடாளுமன்ற உறுப்பினர் இராமநாதன் அர்ச்சுனா விசேட சிறப்புரிமை மீறல் பிரச்சினையொன்றை (Privilege Issue) எழுப்பி உரையாற்றினார்.
அப்போது, இலங்கைத் தமிழரசுக் கட்சியினாலும், அந்த கட்சியின் சில உள்ளூராட்சி சபை உறுப்பினர்களாலும் தனக்குத் தொடர்ச்சியாகக் கொலை அச்சுறுத்தல்கள் விடுக்கப்பட்டு வருவதாகச் சபையின் கவனத்திற்குக் கொண்டு வந்தார்.
இந்த அச்சுறுத்தல் காரணமாக, ஒரு மக்கள் பிரதிநிதியாகத் தான் நாடாளுமன்றத்திற்கு வருவதிலும், தனது தொகுதி மக்களை நேரில் சந்தித்து அவர்களின் குறைகளைக் கேட்பதிலும் பெரும் இடையூறும், உயிராபத்தும் நிலவி வருவதாக அவர் கவலை வெளியிட்டார்.
நாடாளுமன்ற உறுப்பினர்களின் பாதுகாப்பை உறுதிப்படுத்துவதற்கு அரசாங்கம் இதுவரை முறையான எந்தவொரு நடவடிக்கையையும் எடுக்கவில்லை என்றும், இது குறித்துத் தான் சபையில் தொடர்ச்சியாகப் பேசிய போதிலும், பாதுகாப்பு அதிகாரிகள் தரப்பில் உரிய கவனம் செலுத்தப்படவில்லை என்றும் அர்ச்சுனா எம்.பி குற்றம் சாட்டினார்.
தனது தற்காப்புப் பாதுகாப்புக்காக அரசாங்கத்தால் வழங்கப்பட்டுள்ள அதிகாரபூர்வ துப்பாக்கி (Official Firearm) தொடர்பிலும், அதிகாரிகள் மற்றும் அரசியல் எதிரிகளால் தேவையற்ற சட்டப் பிரச்சினைகள் ஏற்படுத்தப்பட்டு வருவதாக அர்ச்சுனா எம்.பி குறிப்பிட்டார்.
எனினும், அந்தத் துப்பாக்கியைத் தான் ஒருபோதும் முறையற்ற வகையில் பயன்படுத்தியதில்லை என உறுதியளித்த அவர், தமக்கான பாதுகாப்பு அச்சுறுத்தல்கள் குறித்துச் சபாநாயகர் மற்றும் நாடாளுமன்றக் குழுக்கள் உடனடியாகத் தலையிட்டு, முறையான மற்றும் அவசரப் பாதுகாப்பு நடவடிக்கைகளை முன்னெடுக்க வேண்டும் எனப் பலமாக வலியுறுத்தியுள்ளார்.
