இஸ்ரேலின் ஆக்கிரமிப்பு முற்றிலும் சட்டவிரோதமானது! – கனடியப் பிரதமர் மார்க் கார்னி கடும் கண்டனம்!
தெற்கு லெபனான் மீதான இஸ்ரேலின் இராணுவ ஆக்கிரமிப்பு முற்றிலும் சட்டவிரோதமானது எனக் கனடியப் பிரதமர் மார்க் கார்னி (Mark Carney) தனது கடும் கண்டனத்தைப் பதிவு செய்துள்ளார்.
கியூபெக்கில் (Quebec) நடைபெற்ற செய்தியாளர் சந்திப்பின் போது கருத்துத் தெரிவித்த அவர், ஒரு சுதந்திர நாட்டின் எல்லைக்குள் அத்துமீறி நுழைவதை எவ்விதத்திலும் ஏற்றுக்கொள்ள முடியாது எனத் திட்டவட்டமாகத் தெரிவித்துள்ளார்.
லெபனான் அரசாங்கம் ஏற்கனவே ஹிஸ்புல்லா அமைப்பைத் தடை செய்துள்ளதைச் சுட்டிக்காட்டிய பிரதமர், அந்த அமைப்பின் அச்சுறுத்தல்களுக்கு எதிராக லெபனான் அரசு தகுந்த நடவடிக்கைகளை எடுத்து வருவதாகக் குறிப்பிட்டுள்ளார்.
பயங்கரவாத அச்சுறுத்தல்களைக் காரணம்காட்டி, லெபனான் நாட்டின் பிராந்திய இறையாண்மையை நேரடியாக மீறும் இஸ்ரேலின் இந்தச் செயல் சர்வதேச விதிகளுக்கு முரணானது என அவர் சாடியுள்ளார்.
இஸ்ரேலின் இந்த அதிரடி இராணுவ நகர்வு மத்திய கிழக்கில் போரை மேலும் தீவிரப்படுத்தும் என எச்சரித்துள்ள கனடா, உடனடியாக ஆக்கிரமிப்பைக் கைவிடுமாறு வலியுறுத்தியுள்ளது.
