ஈரானின் அடுத்த அதிரடி: செங்கடல் போக்குவரத்தும் முடங்கும்! அமெரிக்க முற்றுகைக்கு ஈரான் இராணுவம் கடும் எச்சரிக்கை
ஈரானியத் துறைமுகங்கள் மீது அமெரிக்கா விதித்துள்ள முற்றுகை நீடிக்குமானால், பாரசீக வளைகுடா மற்றும் ஓமன் கடல் பகுதிகளுக்கு அப்பால் செங்கடல் வழியாக நடைபெறும் சர்வதேசக் கப்பல் போக்குவரத்தையும் முடக்கிவிடுவோம் என ஈரான் இராணுவம் எச்சரித்துள்ளது.
ஈரானிய ஆயுதப் படைகளின் தளபதி மேஜர் ஜெனரல் அலி அப்துல்லாஹி விடுத்துள்ள இந்த எச்சரிக்கை, உலக நாடுகளிடையே பெரும் அதிர்ச்சியை ஏற்படுத்தியுள்ளது.
அமெரிக்காவின் இந்த முற்றுகை போர்நிறுத்த ஒப்பந்தத்தை மீறிய சட்டவிரோதச் செயல் என அவர் சாடியுள்ளார்.
ஈரான் செங்கடலை நேரடியாகக் கொண்டிருக்கவில்லை என்றாலும், ஏமனின் ஹூதி கிளர்ச்சியாளர்கள் போன்ற தனது நட்பு சக்திகள் மூலம் அந்தப் பகுதியில் தாக்குதல்களை நடத்த ஈரான் திட்டமிட்டுள்ளதாகப் பாதுகாப்பு ஆய்வாளர்கள் கருதுகின்றனர்.
இதற்கிடையில், ஈரானின் பொருளாதாரத்தை ஒன்றரை நாட்களில் முடக்கிவிட்டதாக அமெரிக்கா அறிவித்துள்ள போதிலும், ஹோர்முஸ் நீரிணை வழியாகச் சில வணிகப் போக்குவரத்துகள் இன்னும் நடைபெற்று வருகின்றன.
