யாழ்ப்பாணம் காரைநகர் குடும்பப் பெண்ணே சங்குப்பிட்டியில் படுகொலை: உடற்கூறாய்வில் அதிர்ச்சித் தகவல்கள்
கிளிநொச்சி, சங்குப்பிட்டிப் பாலம் அருகே நேற்று முன்தினம் (அக்டோபர் 12) சடலமாக மீட்கப்பட்ட இளம் பெண், யாழ்ப்பாணம் காரைநகர் பகுதியைச் சேர்ந்த 36 வயதுடைய இரு குழந்தைகளின் தாயார் என அடையாளம் காணப்பட்டுள்ளார்.
யாழ்ப்பாணம் போதனா வைத்தியசாலையில் சட்ட மருத்துவ அதிகாரி செ. பிரணவன் முன்னிலையில் நேற்று (அக்டோபர் 13) உடற்கூறாய்வுக்கு உட்படுத்தப்பட்டபோதே, அந்தப் பெண் படுகொலை செய்யப்பட்டமை உறுதியாகியுள்ளதுடன், அதிர்ச்சிக்குரிய தகவல்களும் வெளியாகியுள்ளன.
உடற்கூறாய்வில் வெளியான தகவல்கள்:
பெண்ணின் தலையில் கூரிய ஆயுதத்தால் குத்தப்பட்டு, முகம் உள்ளிட்ட உடல் பகுதிகளில் எரியக்கூடிய திரவம் ஊற்றப்பட்டு எரிக்கப்பட்டு, பின்னர் கடலில் வீசப்பட்டுள்ளார்.
அவரது நுரையீரலில் நீர் புகுந்ததால் ஏற்பட்ட மூச்சுத்திணறலால் அவர் உயிரிழந்தது உடற்கூறாய்வில் தெரியவந்துள்ளது.
அவர் வீட்டை விட்டுப் புறப்படும்போது 10 பவுண் நகை அணிந்திருந்ததாகவும், சடலத்தில் நகைகள் எதுவும் காணப்படவில்லை எனவும் விசாரணையில் தெரியவந்துள்ளது.
பாலியல் பலாத்காரத்திற்கு உள்ளானதாகச் செய்திகள் வெளியான போதிலும், உடற்கூறாய்வில் அது உறுதிப்படுத்தப்படவில்லை.
அந்தப் பெண் வீட்டை விட்டுப் புறப்படும்போது, தனது நண்பியுடன் வவுனியா செல்வதாகக் கணவரிடம் கூறியிருந்தார். எனினும், இதுவரை நடத்தப்பட்ட விசாரணையின்படி, அவர் தனது கணவரிடம் கூறிய நபர்களுடன் செல்லவில்லை என்று தெரியவந்துள்ளது.
இந்தச் சம்பவம் குறித்து பூநகரி காவல்துறையினர் தீவிர விசாரணைகளை மேற்கொண்டு வருவதாகவும், விரைவில் குற்றவாளிகள் கைது செய்யப்படுவார்கள் எனவும் தெரிவித்துள்ளனர்.
