வெடிக்குமா உலகப் போர்? ஈரான் மீது அமெரிக்காவின் கடும் தாக்குதல் – அதிகரிக்கும் பதற்றம்
மத்திய கிழக்கில் அமெரிக்க இராணுவத் தளங்கள் மீது நடத்தப்பட்ட தாக்குதல்களுக்கு பதிலடியாக, ஈரான் மீது சக்திவாய்ந்த இராணுவத் தாக்குதல்களை மேற்கொண்டுள்ளதாக அமெரிக்க இராணுவம் தெரிவித்துள்ளது.
தகவல்களின்படி, ஜோர்டானில் உள்ள அமெரிக்க இராணுவத் தளங்கள் மற்றும் ஹோர்முஸ் நீரிணையில் பயணித்த கப்பல்கள் மீது செவ்வாய்க்கிழமை ஈரான் தாக்குதல் நடத்தியதாக கூறப்படுகிறது.
இதனைத் தொடர்ந்து, ஈராகில் செயல்படும் ஈரான் ஆதரவு ஆயுதக் குழுக்களை இலக்காகக் கொண்டு, அமெரிக்கா மற்றும் சவூதி அரேபியா இணைந்து முதல் முறையாக பகிரங்கமாக அறிவிக்கப்பட்ட கூட்டுத் தாக்குதலை நடத்தியதாக தெரிவிக்கப்பட்டுள்ளது.
அமெரிக்க இராணுவ நிலைகள் மீது நடத்தப்பட்ட தாக்குதலுக்கு கடுமையான பதிலடி வழங்கப்படும் என்று ஜனாதிபதி டொனால்ட் ட்ரம்ப் எச்சரித்த சில மணி நேரங்களிலேயே இந்த நடவடிக்கை மேற்கொள்ளப்பட்டுள்ளது.
அமெரிக்க மத்திய கட்டளை மையம் (CENTCOM) வெளியிட்ட தகவலின்படி, இரண்டு மணி நேரத்திற்கும் மேலாக நடைபெற்ற தாக்குதல்களில் ஈரானின் புரட்சிகர பாதுகாப்புப் படைக்கு சொந்தமான இராணுவக் கட்டளை மையங்கள், ஏவுகணைத் தளங்கள், ஆளில்லா விமான வசதிகள், கடலோர கண்காணிப்பு மற்றும் பாதுகாப்பு மையங்கள் உள்ளிட்ட முக்கிய இலக்குகள் தாக்கப்பட்டுள்ளன.
இதனிடையே, ஹோர்முஸ் ஜலசந்தியில் உள்ள கெஷ்ம் தீவில் நடத்தப்பட்ட தாக்குதலில் இருவர் காயமடைந்ததாகவும், வடமேற்கு ஈரானின் குசெஸ்தான் மாகாணத்திலும் பல வெடிப்புகள் பதிவாகியுள்ளதாக ஈரானிய அரசு ஊடகங்கள் செய்தி வெளியிட்டுள்ளன.
மேலும், எகிப்தின் டாமியெட்டா துறைமுகத்தில் நங்கூரமிட்டிருந்த இரண்டு இயற்கை எரிவாயு கப்பல்கள் மீது ஆளில்லா விமானத் தாக்குதல் நடத்தப்பட்டதால் தீ விபத்து ஏற்பட்டதாக பிரிட்டிஷ் கடல்சார் பாதுகாப்பு நிறுவனம் ஆம்ப்ரே தெரிவித்துள்ளது.
பல நாட்கள் நீடித்திருந்த பதற்றமற்ற நிலைக்கு பின்னர், பல்வேறு பகுதிகளில் மீண்டும் மோதல்கள் வெடித்துள்ளதால், மத்திய கிழக்கில் முழுமையான போர் வெடிக்கும் அபாயம் அதிகரித்துள்ளதாக சர்வதேச அரசியல் ஆய்வாளர்கள் எச்சரித்துள்ளனர்.
