கொழும்பில் பெண்ணுக்கு நேர்ந்த கொடூரம்! தலைமுடியை வெட்டித் தாக்குதல் நடத்திய கும்பலுக்கு நீதிமன்றம் பிறப்பித்த உத்தரவு!
கொழும்பு, ராகம பகுதியில் உள்ள பரிசுப் பொருட்கள் விற்பனை நிலையம் ஒன்றில் பொருட்களைத் திருடியதாகக் கூறி, பெண்ணொருவரைச் சுற்றி வளைத்த கும்பல் ஒன்று அவரை மிகக் கொடூரமாகத் தாக்கியுள்ளது.
அத்துடன் அப்பெண்ணின் தலைமுடியையும் வெட்டி மனிதாபிமானமற்ற முறையில் அவர்கள் செயற்பட்டுள்ளனர்.
இச்சம்பவம் தொடர்பான காணொளிகள் சமூக வலைத்தளங்களில் வெளியாகிப் பெரும் அதிர்ச்சியை ஏற்படுத்தியிருந்த நிலையில், பொலிஸார் விசாரணைகளைத் தீவிரப்படுத்தியிருந்தனர்.
இந்தச் சம்பவம் தொடர்பாகக் கைது செய்யப்பட்ட பிரதான சந்தேக நபர் உள்ளிட்ட ஐந்து பேரையும், நேற்று வெலிசற பதில் நீதிவான் முன்னிலையில் முன்னிலைப்படுத்தப்பட்டனர்.
இதன்போது, ஐந்து சந்தேக நபர்களையும் நாளை வரை விளக்கமறியலில் வைக்க நீதிவான் உத்தரவிட்டுள்ளார்.
சட்டத்தைக் கையில் எடுத்துக்கொண்டு பெண்ணொருவரை இழிவுபடுத்திய இக்கும்பலுக்கு எதிராகக் கடுமையான சட்ட நடவடிக்கை எடுக்குமாறு சமூக ஆர்வலர்கள் கோரிக்கை விடுத்துள்ளனர்.
