பிரித்தானியா செல்ல முயன்ற இருவர் கட்டுநாயக்கவில் கைது

பிரித்தானியா செல்ல முயன்ற இருவர் கட்டுநாயக்கவில் கைது

போலியான இலங்கை கடவுச்சீட்டுகளை பயன்படுத்தி நேபாளத்தின் காத்மாண்டு வழியாக பிரித்தானியாவிற்கு செல்ல முயன்ற இரு இலங்கையர்கள் கட்டுநாயக்க விமான நிலையத்தில் கைது செய்யப்பட்டுள்ளனர்.

இந்த கைது நடவடிக்கை நேற்று (31) குடிவரவு மற்றும் குடியகல்வு திணைக்கள அதிகாரிகளால் மேற்கொள்ளப்பட்டது.

இதில் ஒருவர், மட்டக்களப்பு (Batticaloa) பகுதியை வசிப்பிடமாகக் கொண்ட 39 வயதான நபராவார். அவர் நேபாளத்தின் காத்மாண்டுக்கு செல்ல விரும்பி இந்தியன் எயார்லைன்ஸ் AI-282 விமானத்தில் பயணம் செய்யும் நோக்கில் கட்டுநாயக்க விமான நிலையத்தை வந்தடைந்தார்.

அவர் அனைத்து விமான அனுமதிகளையும் முடித்துவிட்டு, குடியேற்ற தொடர்பான செயல்பாடுகளை மேற்கொண்டு, குடிவரவு அதிகாரிகளிடம் வந்தபோது, அவரின் சந்தேகத்திற்குரிய நடத்தை கவனத்திலெடுக்கப்பட்டது.

இதையடுத்து, அதிகாரிகள் அவரிடமிருந்து விசாரணை மேற்கொண்ட போது, அவர் கொண்டிருந்த பயணப் பொருட்களில், புகைப்படங்களுடன் கூடிய போலியான இலங்கை கடவுச்சீட்டும் கண்டுபிடிக்கப்பட்டது.

மேலும், இதேபோன்று போலியான இலங்கை கடவுச்சீட்டை தன்னுடன் வைத்திருந்த மற்றொரு நபர், அனைத்து விமான அனுமதிகளையும் முடித்துவிட்டு, இந்திய விமானத்திலேயே நுழைந்ததாகவும் தெரியவந்துள்ளது.

இதன்படி, இரு சந்தேகநபர்களும் கைது செய்யப்பட்டு, மேலதிக விசாரணைகள் மேற்கொள்ளப்பட்டு வருகின்றன.