இனிமேல் மென்மையாக இருக்க முடியாது! – துப்பாக்கி ஏந்தி ஈரானை எச்சரித்த ஜனாதிபதி ட்ரம்ப் வெளியிட்ட பதிவு
அமெரிக்க ஜனாதிபதி டொனால்ட் ட்ரம்ப் இன்று காலை தனது ‘ட்ரூத் சோசியல்’ பக்கத்தில் ஈரானுக்கு நேரடி எச்சரிக்கை ஒன்றை விடுத்துள்ளார்.
ஈரான் தனது நிலைப்பாடுகளைச் சரியாக ஒருங்கிணைக்கத் தவறிவிட்டதாகக் குற்றம் சுமத்தியுள்ள அவர், அந்த நாடு அணு ஆயுதமற்ற ஒப்பந்தத்தில் கையெழுத்திடத் தெரியாமல் தடுமாறுவதாகத் தெரிவித்துள்ளார்.
“ஈரான் விரைவில் புத்திசாலித்தனமாக நடந்துகொள்வது நல்லது” என எச்சரித்துள்ள ட்ரம்ப், குண்டுவெடிப்புகளுக்கு மத்தியில் தான் ஒரு துப்பாக்கியை ஏந்தியிருப்பது போன்ற புகைப்படத்தைப் பகிர்ந்து சர்வதேச அளவில் அதிர்வலைகளை ஏற்படுத்தியுள்ளார்.
பிரித்தானிய மன்னர் சார்லஸை கௌரவிக்கும் வகையில் வெள்ளை மாளிகையில் நடத்தப்பட்ட விருந்துக்கு மறுதினமே இந்த அறிவிப்பு வெளியாகியுள்ளது.
இந்த விருந்தின் போது, ஈரான் ஒருபோதும் அணு ஆயுதத்தை வைத்திருக்கக் கூடாது என்பதில் மன்னர் சார்லஸ் தன்னை விடவும் உறுதியாக இருப்பதாக ட்ரம்ப் குறிப்பிட்டிருந்தார்.
இந்தத் தொடர்ச்சியான பதிவுகள், ஈரான் மீதான அமெரிக்காவின் பொருளாதார மற்றும் இராணுவ அழுத்தங்கள் வரும் நாட்களில் மேலும் தீவிரமடையக்கூடும் என்பதை உறுதிப்படுத்துகின்றன.
