கொழும்பு கொள்ளுப்பிட்டி வீதியில் திடீரென முறிந்து வீழ்ந்த பாரிய மரம்; வாகனங்கள் சேதம்
கொழும்பு, கொள்ளுப்பிட்டி மற்றும் பம்பலப்பிட்டி ஆகிய பகுதிகளை இணைக்கும் பிரதான வீதியான டுப்ளிகேஷன் வீதியில் (Duplication Road), இன்று திடீரென வீதியோரத்தில் இருந்த பாரிய மரமொன்று முறிந்து நடுவீதியில் வீழ்ந்துள்ளது.
எதிர்பாராத விதமாக இந்த மரம் வீழ்ந்த போது, அவ்வீதியால் பயணித்துக் கொண்டிருந்த ஒரு லொறி மற்றும் கார் என்பவற்றின் மீது மரம் பலமாக மோதியுள்ளது.
இந்த விபத்தில் லொறியும் காரும் பலத்த சேதங்களுக்கு உள்ளாகியுள்ளன. எனினும், அதிர்ஷ்டவசமாக உயிர் ஆபத்துகள் எதுவும் ஏற்படவில்லை என முதற்கட்ட தகவல்கள் தெரிவிக்கின்றன.
மரம் முறிந்து வீதியின் குறுக்கே வீழ்ந்துள்ளதன் காரணமாக, கொள்ளுப்பிட்டி மற்றும் பம்பலப்பிட்டிக்கு இடையேயான டுப்ளிகேஷன் பாதையூடான போக்குவரத்து முற்றாக ஸ்தம்பிதமடைந்துள்ளதுடன், அங்கு மிகக் கடுமையான வாகன நெரிசல் ஏற்பட்டுள்ளது.
சம்பவ இடத்திற்கு விரைந்துள்ள கொழும்பு மாநகர சபை ஊழியர்கள் மற்றும் பொலிஸார், முறிந்து வீழ்ந்த மரத்தை வெட்டி அகற்றும் பணிகளில் தீவிரமாக ஈடுபட்டு வருகின்றனர். போக்குவரத்து சீரமைக்கப்படும் வரை, அந்த வீதியைப் பயன்படுத்தும் வாகன சாரதிகள் உடனடியாக மாற்று வீதிகளைப் பயன்படுத்துமாறு பொலிஸார் அவசரமாகக் கேட்டுக்கொண்டுள்ளனர்.
