ஹோர்மூஸ் அருகே வெடித்து சிதறிய அமெரிக்காவின் மற்றய போர் விமானம்! அடுத்தடுத்து அதிரடி காட்டும் ஈரான்.
வளைகுடா பிராந்தியத்தில் அமெரிக்க வான்படைக்கு அடுத்தடுத்து பேரிழப்புகள் ஏற்பட்டு வருகின்றன. ஈரானின் வான் பாதுகாப்புப் படையினரால் அமெரிக்காவின் அதிநவீன A-10 Warthog போர் விமானம் நேற்று (03.04.2026) வெள்ளிக்கிழமை ஹோர்மூஸ் அருகே சுட்டு வீழ்த்தப்பட்டதாகத் ‘தி நியூயார்க் டைம்ஸ்’ செய்தி வெளியிட்டுள்ளது.
அதிர்ஷ்டவசமாக இந்த விமானத்திலிருந்து ஒரு விமானி பாதுகாப்பாக மீட்கப்பட்டுள்ளார். எனினும், முன்னதாக வீழ்த்தப்பட்ட F-15E Strike Eagle விமானத்திலிருந்த இருவரில் ஒருவர் இன்னும் மாயமாகியுள்ளமை அமெரிக்காவிற்குப் பெரும் கவலையை ஏற்படுத்தியுள்ளது.
மாயமான விமானியைத் தேடி ஈரானிய எல்லைக்குள் C-130 Hercules மற்றும் Black Hawk ஹெலிகாப்டர்கள் மூலம் அமெரிக்கா மிகப்பெரிய மீட்பு நடவடிக்கையை முன்னெடுத்து வருகிறது.
இந்த மீட்புப் படைகள் மீது ஈரானிய வான் பாதுகாப்பு அமைப்புகள் சரமாரித் தாக்குதல்களை நடத்தி வருகின்றன. இந்தத் தாக்குதலில் அமெரிக்காவின் UH-60 Black Hawk ஹெலிகாப்டர் ஒன்று ஈராக் வான்வெளியில் வீழ்த்தப்பட்டதாக ஈரான் கூறி வரும் நிலையில், அமெரிக்கா அதனை இன்னும் உறுதிப்படுத்தவில்லை.
ஜனாதிபதி ட்ரம்ப் இந்த நிலவரங்கள் குறித்துத் தொடர்ந்து தகவல்களைப் பெற்று வருவதாக வெள்ளை மாளிகை தெரிவித்துள்ளது.
தென் ஈரான் பகுதிகளில் தாழ்வாகப் பறக்கும் அமெரிக்க மீட்பு விமானங்களின் வீடியோக்கள் சமூக வலைத்தளங்களில் வைரலாகி வருகின்றன. இதற்கிடையில், உயிர் தப்பிய அமெரிக்க விமானிகளைக் கண்டறிய உதவுமாறு ஈரானிய அரசு பொதுமக்களுக்கு விசேட அறிவிப்பை வெளியிட்டுள்ளது.
“எதிரி விமானி” குறித்த தகவலை வழங்குபவர்களுக்குப் பரிசு வழங்கப்படும் எனவும் ஈரான் அறிவித்துள்ளது. அத்துடன் மற்றுமொரு F-35 போர் விமானத்தையும் வீழ்த்தியதாக ஈரான் கூறி வருவது வளைகுடாப் போரை மிக மோசமான கட்டத்திற்கு இட்டுச் சென்றுள்ளது.
