அரசாங்கத்துக்குள் இருந்து கொண்டு அரசாங்கத்தை விமர்சிப்பது மிகப்பெரிய அரசியல் தவறு என்று பிரதமர் மகிந்த ராஜபக்ச தெரிவித்துள்ளார்.
மத்திய அதிவேக நெடுஞ்சாலையின், மீரிகம முதல் குருநாகல் வரையிலான பகுதி, ஜனாதிபதி கோட்டாபய ராஜபக்ச மற்றும் பிரதமர் மகிந்த ராஜபக்ச ஆகியோரால், நேற்று மாலை மக்கள் பாவனைக்காகத் திறந்து வைக்கப்பட்டது.
இந்தநிகழ்வில் கலந்து கொண்டு உரையாற்றிய போதே, அவர் இவ்வாறு கூறியுள்ளார்.
“அரசாங்கத்தில் இருந்து கொண்டு அரசை விமர்சிப்பது மேல் நோக்கிப் பார்த்து எச்சில் துப்புவதைப் போன்றது.
அது மிகப்பெரிய அரசியல் தவறு. அரசாங்கத்தில் வெளியேறி அரசை விமர்சிப்பதற்குக் கதவுகள் திறந்தே இருக்கின்றன.
அதேபோல் ஊடகங்கள் மூலம் நடத்தப்படும் அரசியலுக்கும் ஆயுள் குறைவு.
நான் 50 வருடங்களாக அரசியலில் அனுபவங்களைப் பெற்றுள்ளேன். எனினும், எந்தச் சந்தர்ப்பத்திலும் அரசியல் கொள்கைகளிலிருந்து விலகிச் சென்றதில்லை” என்றும், பிரதமர் மகிந்த ராஜபக்ச தெரிவித்துள்ளார்.
