சவூதி வாழ் இலங்கையர்களுக்கு மகிழ்ச்சிச் செய்தி! – தொழிலாளர்களின் வசதிக்காக விசேட ஏற்பாடு!
சவூதி அரேபியாவில் வசிக்கும் இலங்கையர் தங்களது தூதரகச் சேவைகளை இலகுவாகப் பெற்றுக்கொள்ளும் வகையில், சேவைகளை விரிவுபடுத்த இலங்கைத் தூதரகம் தீர்மானித்துள்ளது.
குறிப்பாக, சாதாரண வார நாட்களில் வேலைப்பளு காரணமாகத் தூதரகத்திற்கு வர முடியாதவர்களுக்காக, ஒவ்வொரு மாதத்தின் இறுதி வெள்ளிக்கிழமைகளிலும் விசேட சேவைகள் வழங்கப்படும் என அறிவிக்கப்பட்டுள்ளது.
இந்த அதிரடி மாற்றத்தின் மூலம், தூதரக அணுகலை எளிதாக்குவதே தமது நோக்கம் எனத் தூதரகம் வெளியிட்டுள்ள அறிக்கையில் தெரிவிக்கப்பட்டுள்ளது.
புதிய அறிவிப்பின்படி, மாதத்தின் கடைசி வெள்ளிக்கிழமைகளில் பிற்பகல் 2.00 மணி முதல் மாலை 5.00 மணி வரை தூதரக உதவிகளைப் பெற்றுக்கொள்ளலாம்.
இதற்காக விசேட அதிகாரி ஒருவரும் பணியில் அமர்த்தப்படுவார். ஞாயிறு முதல் வியாழன் வரை காலை 9.00 முதல் மாலை 4.00 மணி வரை வழமையான சேவைகள் நடைபெறும்.
இந்த விசேட வெள்ளிக்கிழமை அமர்வுகளின் போது விண்ணப்பங்கள் ஏற்றுக்கொள்ளப்படும் என்றும், கூடுதல் கால அவகாசம் தேவைப்படும் சேவைகள் பின்னர் ஒரு திகதியில் வழங்கப்படும் என்றும் தூதரகம் மேலும் தெளிவுபடுத்தியுள்ளது.
