முடிந்தால் தேர்தலை நடத்துங்கள்! – அரசாங்கத்திற்கு சஜித் பிரேமதாச பகிரங்க சவால்!
மக்கள் தமது ஆணையை வெளிப்படுத்த வழிவகை செய்யும் வகையில், இழுத்தடிக்கப்பட்டு வரும் மாகாண சபைத் தேர்தல்களை உடனடியாக நடத்துமாறு அரசாங்கத்திற்குச் சஜித் பிரேமதாச சவால் விடுத்துள்ளார்.
மாளிகாவத்தை பி.டி. சிறிசேன மைதானத்தில் திரண்டிருந்த பல்லாயிரக்கணக்கான தொழிலாளர்கள் முன்னிலையில் உரையாற்றிய அவர், பொது நிறுவனங்கள் பலவீனப்படுத்தப்பட்டு நாடு சீர்குலைந்துள்ளதாகக் குற்றம் சாட்டினார்.
நலிவடைந்த சமூகங்கள் மற்றும் விவசாயிகளின் பிரச்சினைகளுக்குத் தீர்வு காணத் தனது கட்சி தயாராக இருப்பதாகவும் அவர் குறிப்பிட்டார்.
ஐக்கிய மக்கள் சக்தியும், ஐக்கிய தேசியக் கட்சியும் ஏற்கனவே கொள்கை ரீதியாக ஒன்றிணைந்து விட்டதாகச் சஜித் பிரேமதாச இதன்போது மிக முக்கியமான அறிவிப்பை வெளியிட்டார்.
இரு தரப்பையும் இணைக்கக் குழுக்கள் அமைக்கப்பட வேண்டிய அவசியம் இனி இல்லை என்றும், கூட்டணி ஏற்கனவே வடிவம் பெற்றுவிட்டது என்றும் அவர் தெரிவித்தார்.
இந்த ஒற்றுமையைக் குலைக்கச் சில தனிநபர்கள் முயற்சிப்பதாகச் சாடிய அவர், அத்தகைய முயற்சிகள் ஒருபோதும் வெற்றி பெறாது என எச்சரித்தார்.
நாட்டைப் புனரமைக்க அனைத்து முற்போக்கு சக்திகளுடனும் இணைந்து பயணிக்கத் தான் தயாராக இருப்பதாகவும் சஜித் சுட்டிக்காட்டினார்.
